კორონავირუსისგან ეფექტურად დასაცავად, შესაძლოა ორი პირბადის ტარება დაგვჭირდეს

კორონავირუსის პანდემიის წინააღმდეგ ბრძოლისა და ვირუსისგან თავდაცვის ერთ-ერთ მთავარ იარაღად კვლავ პირბადე მიიჩნევა. ის ჩვენი ყოველდღიურობის ნაწილი გახდა, რომლის გარეშეც ცხოვრება ახლა უბრალოდ წარმოუდგენელია.

თუმცა, მეცნიერები ამბობენ, რომ პირბადე არ წარმოადგენს 100%-იან დაცვას და არსებობს შანსი იმისა, რომ მაინც დაინფიცირდეთ მაშინაც კი, თუ ის მუდამ გიკეთიათ. აშშ-ის დაავადებათა კონტროლის ცენტრმა პირბადის ეფექტიანობასთან დაკავშირებით კვლევა ჩაატარა და გამოაქვეყნა შედეგი, რომელშიც აღწერილია, თუ როგორ უნდა გაიკეთოთ პირბადე მაქსიმალური ეფექტის მისაღებად.

კვლევის მიხედვით, ეფექტიანობა ორმაგად იზრდება იმ შემთხვევაში, თუ ორი პირბადე, ან ორმაგი პირბადე გიკეთიათ. ასეთ შემთხვევაში დაცულობა 92,5%-ია, ასევე მნიშვნელოვანია ისიც, თუ როგორ გიკეთიათ პირბადე.

შეერთებული შტატების დაავადებათა კონტროლის ცენტრში პირბადის გაკეთების ორ ეფექტიან გზას გამოყოფენ:

• ორმაგი სამედიცინო პირბადის გაკეთება, ასევე შესაძლებელია იგივე ეფექტის მიღება, თუ სამედიცინო პირბადეზე ჩვეულებრივ ნაჭრის პირბადეს გაიკეთებთ.
• პირბადის იმგვარად გაკეთება, რომ ცარიელი ადგილი ფაქტობრივად არ რჩებოდეს, სახეზე ის კარგად უნდა იყოს მოჭერილი.

აღსანიშნავია, რომ შეერთებული შტატების დაავადებათა კონტროლის ცენტრში საუბრობენ ორი პირბადის ტარების ეფექტურობაზე, თუმცა ჯერჯერობით მისი აუცილებლად გაკეთების რეკომენდაციას არ გასცემენ. ენტონი ფაუჩის თქმით, საჭიროა დამატებით კვლევების ჩატარება ორი პირბადის ტარების უსაფრთხოებასთან დაკავშირებით.

მეცნიერთა თქმით, რაც უფრო მეტი შრე აქვს პირბადეს, მით უფრო მეტად გიცავთ ის. რადგანაც ამ შემთხვევაში, ვირუსი მასში ვეღარ აღწევს.

წყარო: nbcnews.com