ნათია თურნავა და დავით ზალკალიანი ღარიბაშვილის მინისტრთა კაბინეტში, სავარაუდოდ, აღარ იქნებიან

ambebi.ge სანდო წყაროზე დაყრდნობით უკვე წერდა, თუ ვინ შეიძლება ვეღარ ვიხილოთ ახალ მინისტრთა კაბინეტსა და პრემიერის ადმინისტრაციაში გიორგი გახარიას ხელისუფლებიდან წასვლის შემდეგ.

"გახარიას უცილებლად მიჰყვება მისი ადმინისტრაციის ხელმძღვანელი კახა ქემოკლიძე და სხვა უმნიშვნელო ფიგურები. მისი კვოტით პარლამენტში წარმოდგენილ ჯგუფს - ირაკლი ჩიქოვანს, ალექსანდრე მოწერელიას, გიორგი ხოჯევანიშვილს, მიხეილ დაუშვილს და ბექა ლილუაშვილს რაც შეეხება, სავარაუდოდ, ეს დეპუტატებიც მიჰყვებიან გახარიას. მისი კადრები და დეპუტატები ასე უცებ შეიძლება არც წავიდნენ, ნელ-ნელა წავლენ. დიდი ალბათობით, პოსტს დაატოვებინებენ შს მინისტრის მოადგილე კახა საბანაძეს, რომელიც გახარიას კადრია და რომლის გადაყენებაზეც კარგა ხანს მიდიოდა საუბარი, თუმცა გახარიას პრემიერობის და მხარდაჭერის პირობებში “ოცნება” ამას ვერ ბედავდა. მინისტრთა კაბინეტიდანაც ალბათ 1-2 კაცი წავა, სავარაუდოდ, ესენი შეიძლება იყვნენ: დავით ზალკალიანი და ნათია თურნავა..." - განაცხადა ჩვენთან საუბარში კონფიდენციალურმა წყარომ. (იხილეთ სტატია სრულად)

მედიაში კი ვრცელდება უკვე ინფორმაცია, რომ საგარეო საქმეთა მინისტრის პოსტს, სავარაუდოდ, ქართული ოცნების მე-10 მოწვევის პარლამენტის დეპუტატი გიორგი ხელაშვილი დაიკავებს. ეკონომიკისა და მდგრადი განვითარების მინისტრის თანამდებობაზე ნათია თურნავას კი ივანე მაჭავარიანი შეცვლის, რომელიც ახლა ფინანსთა მინისტრის პოსტს იკავებს, ამ ინფორმაციას "ფორმულა" ავრცელებს.