"ითქვა, რომ ბიჭებს RGD-ს ტიპის ხელყუმბარა აუფეთქდათ, ზოგი ამბობს იპოვესო, ზოგმა თქვა - თან ჰქონდათო" - რა მოხდა გარდაბანში, სადაც აფეთქებას მოზარდი ემსხვერპლა

დღეს გარდაბანში, აფეთქების შედეგად ორი ძმა დაშავდა, ერთი მათგანი - კლინიკაში მიყვანისას გარდაიცვალა. უმცროს ძმას კი ამჟამად ოპერაცია უტარდება."ჯეო ჰოსპიტალსის“ ექიმის ნონა ასათიანის განცხადებით, 9 წლის მოზარდს კლინიკაში შეყვანის დროს მრავლობითი დაზიანება აღენიშნებოდა, რაც სიცოცხლისთვის შეუთავსებელი აღმოჩნდა. აფეთქების შედეგად დაშავებული მეორე - 7 წლის ბიჭის ჯანმრთელობის მდგომარეობა კი სტაბილურია და მის სიცოცხლეს საფრთხე არ ემუქრება.

“რაც შეეხება მეორე შემთხვევას, იქ ძალიან რთული შემთხვევა იყო. ბავშვი შემოვიდა ისე, რომ პულსი და წნევა არ ესინჯებოდა, ჰქონდა მრავლობითი დაზიანებები, რომლებიც სიცოცხლისთვის შეუთავსებელი აღმოჩნდა“, - განაცხადა ნონა ასათიანმა.

შსს-მ მომხდარზე გამოძიება სისხლის სამართლის კოდექსის 229-ე მუხლით დაიწყო, რაც აფეთქებას გულისხმობს.

ambebi.ge-ს გარდაბნის მკვიდრი შემდეგს უყვება:

“ბავშვები გაკვეთილების დასრულების შემდეგ, დაუსახლებელ ტერიტორიაზე, მინდორში იმყოფებოდნენ, სადაც აფეთქება მოხდა. როგორც ამბობენ, მათ RGD-ს ტიპის ხელყუმბარა აუფეთქდათ. არ ვიცით, საიდან აღმოაჩნდათ, ზოგი ამბობს იპოვეს, ზოგმა თქვა - თან ჰქონდათო. აფეთქებამ უფროს ძმას, მუცლის არე გაუფლითა, კლინიკაში ცოცხალ-მკვდარი მიიყვანეს და ექიმებმა მისი გადარჩენა ვერ შეძლეს. უმცროსის მდგომარეობა მძიმე არაა და ექიმები გვაიმედებენ, რომ გადარჩება. ძმები ეთნიკურად აზერბაიჯანელები არიან და გარდაბნის მე-3 საჯარო სკოლაში სწავლობენ”.