"ჩვენ არ ვართ რასისტების ოჯახი...ვაპირებ ჩემს ძმას დაველაპარაკო" - პრინც უილიამის პირველი კომენტარი ჰარისა და მეგანის სკანდალური ინტერვიუს შემდეგ

კემბრიჯის ჰერცოგი, პრინც ჰარის ძმა, პრინცი უილიამი მეგანისა და ჰარის სკანდალური ინტერვიუს შემდეგ პირველ კომენტარს აკეთებს. ამის შესახებ BBC წერს. ის საზოგადოების წინაშე თავის ცოლთან, ქეით მილდტონთან ერთად გამოჩნდა და ჟურნალისტების კითხვებს რამდენიმე წინადადებით უპასუხა.

უილიამმა თქვა, რომ ჯერ არ უსაუბრია ძმასთან, თუმცა აპირებს, რომ დაელაპარაკოს, ასევე მან კომენტარი გააკეთა რასიზმთან დაკავშირებითაც. ცნობისთვის მეგანმა და ჰარიმ სამეფო ოჯახი რასიზმში დაადანაშაულა. ოპრა უინფრისთან ინტერვიუში თქვეს, რომ სამეფო ოჯახის ერთ-ერთი წევრი მათ ბავშვის კანის ფერზე ეკითხებოდა და სწორედ ამის მიხედვით აპირებდნენ განესაზღვრათ, მისცემდნენ თუ არა პატარას პრინცის სტატუსს.

ჟურნალისტმა უილიამსა და ქეითს ასეთი კითხვა დაუსვა - "სამეფო ოჯახი რასისტების ოჯახია?“, რაზეც პრინცმა უპასუხა - "ჩვენ არ ვართ რასისტები, ჩვენი ოჯახი არ ვართ რასისტები. ჯერ ჩემს ძმასთან არ მისაუბრია, მაგრამ ვაპირებ, რომ ველაპარაკო“ - აღნიშნა კემბრიჯის ჰერცოგმა.

ცნობისთვის, ჰარისა და მეგანის ინტერვიუს შემდეგ განცხადება გაავრცელა დედოფალმა ელისაბედმაც.

"მთელი ოჯახი დამწუხრებულია იმის გაგებით, რამდენად რთული იყო ჰარისა და მეგანისთვის ბოლო წლები. წამოჭრილი საკითხები, კერძოდ კი რასიზმთან დაკავშირებული საკითხი, შემაშფოთებელია.

ჩვენ ყოველივე სერიოზულად მივიღეთ და მიუხედავად იმისა, რომ მოგონებები შესაძლოა განსხვავებული იყოს, ოჯახი პირადად განიხილავს მათ. ჰარი, მეგანი და არჩი ყოველთვის იქნებიან ოჯახის საყვარელი წევრები“, – აღნიშნულია სამეფო სახლის მიერ გავრცელებულ განცხადებაში.

ამავე თემაზე: "სამეფო კარის თამაშები" და ბრიტანული სამეფო ოჯახის მანკიერი მხარეები - 13 შოკისმომგვრელი ფაქტი ჰარისა და მეგანის 7 მლნ დოლარიანი ინტერვიუდან