"ჰიგიენური საშუალებების წლიური ხარჯი არ მოიცავს მხოლოდ ქაღალდისა და საპნის ხარჯს..." - პრეზიდენტის ადმინისტრაცია სალომე ზურაბიშვილის ხარჯებზე "TV პირველის" სიუჟეტს ეხმაურება

პრეზიდენტის ადმინისტრაცია "TV პირველის" ეთერში გასულ სიუჟეტს ეხმაურება, სადაც პრეზიდენტის საპროტოკოლო ხარჯებზე იყო საუბარი.

"„ჰიგიენურ საშუალებებსა (ტუალეტის ქაღალდებსა და საპონზე)“ და საპროტოკოლო ხარჯებთან დაკავშირებით შენიშვნებს არასერიოზულად მიიჩნევს. ჰიგიენური საშუალებების წლიური ხარჯი არ მოიცავს მხოლოდ ქაღალდისა და საპნის ხარჯს, ის მოიცავს ასევე, კოვიდის პრევენციის მიზნით შეძენილ სადეზინფექციო საშუალებებსაც.

საკითხი, რომელზეც გვსურს საზოგადოების ინფორმირება, ეს არის ადმინისტრაციის ავტოპარკი.

საქართველოს პრეზიდენტის ადმინისტრაციის ბალანსზე არსებული ავტოპარკი:

• მიხეილ სააკაშვილის პრეზიდენტობის ვადის ამოწურვის შემდეგ (2013) - 60 მანქანა;
• გიორგი მარგველაშვილის პრეზიდენტობის ვადის ამოწურვის შემდეგ (2018) - 44 მანქანა;
• სალომე ზურაბიშვილის ადმინისტრაციის ბალანსზე (2021) - 23 მანქანა, რომელთაგან უმეტესობა (15 ავტომანქანა) 2008 -2011-2012 წლის გამოშვებაა და შესაბამისად, ტექნიკური მომსახურებისა და შეკეთების ხარჯებს საჭიროებს.

„TV პირველი“ არასწორ ინფორმაციას ავრცელებს ავტომობილების მომსახურებასა და შეკეთების ხარჯებთან დაკავშირებით. მათ მიერ მითითებული თანხა - ნახევარ მილიონ ლარზე მეტი, კომპანიის მიერ ტენდერში შემოთავაზებულ წინადადებას (პრეისკურანტს) წარმოადგენს. გაფორმებული ხელშეკრულების თანხა კი, არაუმეტეს 54 728 ლარია.

სალომე ზურაბიშვილის პრეზიდენტობის განმავლობაში ადმინისტრაციას არ შეუძენია არცერთი ავტომობილი. რაც შეეხება პრეზიდენტს, როდესაც ის ფეხით არ დადის, სარგებლობს 2010 წელს გამოშვებული ავტომობილით", - აღნიშნულია ადმინისტრაციის "ფეისბუქ-განცხადებაში".

"TV პირველის" ინფორმაციით, შესყიდვების სააგენტოს მონაცემებით, პრეზიდენტის უახლოესი შესყიდვები ასე გამოიყურება:

500 000 ლარი - მანქანების მომსახურებაში;

6500 ცალი ტუალეტის ქაღალდი;

300 ლიტრი - საპონი (უმაღლესი ხარისხის, რომელიც ხელის კანს არ აუხეშებს).

100 000 ლარი - პოლიგრაფიული მასალის ბეჭვდაში;

1000 ცალი სადილის ბარათები ყდა ლენტით სადღეგრძელოს შიგთავსით შესაძენთა ნუსხაშია.

ტელეკომპანიის ცნობით, შესყიდვების სიაშია ბრენდირებული ბლოკნოტები და დასამზადებელია სასაჩუქრე ჩანთები. მათივე ინფორმაციით, პრეზიდენტის გადაწყვეტილებით, ადმინისტრაციის თანამშრომლებმა ეთიკის კურსიც უნდა გაიარონ.