ვლადიმერ პოზნერმა თბილისის, შესაძლოა, დროზე ადრე დატოვოს - რა ხდებოდა მთელი ღამე "რუმსთან", სადაც რუსი შეუმენები იმყოფებოდნენ

არ ვიცი, როდის გავფრინდებით, შეიძლება ეს უფრო ადრეც მოხდეს, - ამის შესახებ რუსმა ჟურნალისტმა ვლადიმერ პოზნერმა "რიანოვოსტს" განუცხადა.

"დღეის მდგომარეობით, არ ვიცი, როდის გავფრინდებით, შეიძლება, ეს უფრო ადრეც მოხდეს“, – განაცხადა მან.

კითხვაზე, თუ ვინ უზრუნველყოფს მის უსაფრთხოებას, პოზნერი აცხადებს, რომ პოლიცია იცავს.

“ამჟამად სასტუმროში ვიმყოფები. უსაფრთხოდ ვარ“, - განაცხადა პოზნერმა.

მისივე თქმით, თბილისში საკუთარი დაბადების დღის აღსანიშნავად ჩამოვიდა და უკან დაბრუნებას 3 აპრილს გეგმავდა.

მთელი ღამის განმავლობაში სასტუმრო "რუმსთან" სამოქალაქო აქტივისტები იმყოფებოდნენ. მათ ადგილზე ქატო დაყარეს. როგორც ისინი აცხადებენ, ოკუპანტებს ხვდებიან „როგორც ღორებს“.

„ქატოთი ვხვდებით ოკუპანტ ღორს და ქართული სამზარეულოს ნაცვლად მიიღებენ ქატოს, როგორც შეეფერებათ ოკუპანტ ღორებს“,- განაცხადა აქტივისტმა.

ასევე ტორტი მიიტანეს, რომელზეც პროტესტის ნიშნად უცენზურო შინაარისის წარწერა არის დატანილი. აქტივისტების განმარტებით, ამ ტორტით და პერფორმასით პოზნერს დაბადების დღეს ულოცავენ.

შეგახსენებთ, ვლადიმერ პოზნერი საქართველოში 31 მარტს ჩამოვიდა. მის ვიზიტს საქართველოში სამოქალაქო აქტივისტების პროტესტი მოჰყვა, რომლებსაც მოგვიანებით, პოლიტიკოსებიც შეუერთდნენ. პოზნერს სასტუმრო "ვინოტელის" დატოვება, სადაც ის სტუმრებთან ერთად ვახშმობდა, პროტესტის ფონზე, პოლიციის კორდონის საშუალებით, მოუწია. სასტუმრო "ვინოტელი" კი შრომის ინსპექციის სამსახურმა აკრძალული საქმიანობის განხორციელებისთვის, 10 000 ლარით დააჯარიმა. აქციის მონაწილეების თქმით, პოზნერი არის განცხადების ავტორი, რომლის თანახმადაც "აფხაზეთი არასდროს იქნება საქართველოს ნაწილი" და მან საქართველო უნდა დატოვოს. ამასთან, აქტივისტები აცხადებდნენ, რომ პოზნერმა და მისმა სტუმრებმა ე.წ. კომენდანტის საათი დაარღვიეს.