"წელიწადი და ორი თვეა მამის საფლავზე სანთელი ვერ ამინთია! მაფერხებს წესები, რაც ჩემი ქვეყნის მთავრობამ დამიწესა!" - სულისშემძვრელი კადრები დოკუმენტური ფილმიდან "მე გადავცურე ენგური"

სოციალურ ქსელში მორიგი ვიდეო ვრცელდება, სადაც ასახულია, თუ რა გზის გავლა უწევთ ჩვენს გალელ თანამემამულეებს ზუგდიდში გადმოსასვლელად. "ეს ყველა იმ ადამიანის ყოველდღიურობაა, რომლებიც ვცხოვრობთ ოკუპირებულ აფხაზეთში", - წერს თამო არდაშელია, რომელიც "ფეისბუქის" პირად გვერდზე სულისშემძვრელ კადრებს ავრცელებს.

"ფილმის კადრები არ გეგონოთ... ეს ყველა იმ ადამიანის ყოველდღიურობაა, რომლებსაც აფხაზეთის ტერიტორიაზე, ჯერ კიდევ შეხება გვაქვს! შემიძლია დაუსრულებლად ვისაუბრო, მაგრამ ვისთვის?! რისთვის?!

წელიწადი და ორი თვეა სახლში არ ვყოფილვარ. მამის საფლავზე სანთელი ვერ ამინთია! გგონია ამ გზის გავლამ შემაფერხა?! არა!! მაფერხებს ის წესები, რაც ჩემი ქვეყნის მთავრობამ დამიწესა!!

პ.ს ამ კადრებზე კიდევ მარტივი "ჩორნიხოდებია" ასახული... (მაშინ, აბიტურიენტობისას, კვირაში ორ დღეს ამ გზას როცა გავდიოდი, ყველაზე საშინელ დღეებად წარმომედგინა! დღეს კი ამ რეალობიდან...)

პ.ს.ს. კადრები აღებულია #მეგადავცურეენგური მოკლემეტრაჟიანი დოკუმენტური ფილმიდან, სადაც სურვილის შემთხვევაში მეტის ნახვა შეგიძლიათ..." - წერს თამო არდაშელია.

• "ასეთ პირობებში უწევთ გალელებს პენსიების ასაღებად და მედიკამენტების შესაძენად ზუგდიდში გადმოსვლა" - "ფეისბუქზე" უმძიმესი კადრები ვრცელდება

ცნობისთვის, ენგურის ხიდზე გადაადგილება შეზღუდულია და წელიწადზე მეტია ადგილობრივებს ცენტრალური ხელისუფლების მიერ კონტროლირებად ტერიტორიაზე თავისუფლად მიმოსვლის შესაძლებლობა არ აქვთ. გზა საქართველოში Covid-19-ის პირველი შემთხვევის დაფიქსირებისთანავე ოკუპირებული აფხაზეთის დე ფაქტო მთავრობამ ჩაკეტა. ადგილობრივები ამბობენ, რომ აფხაზებთან გარკვეული სახის მოლაპარაკების საფუძველზე ხიდის გადაკვეთის შესაძლებლობა არის, თუმცა ბარიერი საქართველოს მთავრობის მიერ დაწესებული 5-დღიანი სავალდებულო კარანტინია. აღსანიშნავია, რომ საქართველოს სხვა მოქალაქეებისთვის სავალდებულო კარანტინის რეჟიმი არ მოქმედებს.