თურქეთში პანდემიის "მესამე ტალღას" ებრძვიან - 40 000-ზე მეტი ინფიცირებული ყოველდღე და კვლავ შეზღუდვები: როგორია ვითარება მეზობელ ქვეყანაში

მსოფლიოს ქვეყნების ნაწილი უკვე კორონავირუსის "მესამე ტალღას“ ებრძვის. ზოგან ეპიდემიამ იმაზე უფრო რთული ვითარება შექმნა, ვიდრე აქამდე. მაგალითად, მეზობელ თურქეთში ინფიცირებულთა რაოდენობამ ბოლო დღეებია მკვეთრად მოიმატა და ყოველ დღე კორონავირუსის 40 000-ზე მეტი ახალი შემთხვევა ვლინდება.

მაგალითად, გასულ 24 საათში თურქეთში კორონავირუსის 42 551 ახალი შემთხვევა აღწერეს. ბოლო ხუთი დღის სტატისტიკა ასეთია:

• 2 აპრილი - 42 308 შემთხვევა
• 3 აპრილი - 44 756 შემთხვევა
• 4 აპრილი - 41 998 შემთხვევა
• 5 აპრილი - 42 551 შემთხვევა

ვირუსით გარდაცვლილთა რიცხვი ქვეყანაში ყოველ დღე 150-ს სცდება:

• 2 აპრილი - 179 გარდაცვლილი
• 3 აპრილი - 186 გარდაცვლილი
• 4 აპრილი - 185 გარდაცვლილი
• 5 აპრილი - 193 გარდაცვლილი

მკვეთრად გაუარესებული ეპიდემიოლოგიური ვითარების გამო, თურქეთში შეზღუდვები კიდევ უფრო გამკაცრდა.

ქვეყნის 81 პროვინიციიდან 58 ე.წ. წითელ ზონადაა გამოცხადებული. "წითელ ზონადაა" გამოცხადებული სტამბოლი და დედაქალაქი ანკარა. თურექთში 21:00 საათიდან დილის 5:00 საათამდე კომენდანტის საათი მოქმედებს. თურქეთში აქამდე კომენდანტის საათი შაბათ-კვირას არ მოქმედებდა, თუმცა "წითელ ზონებში“ ის კვლავ შემოიღეს. იგეგმება სპეციალური შეზღუდვების დაწესება რამადანის დღესასწაულისთვისაც, აკრძალულია ხალხმრავალი შეკრებები. "წითელ ზონად" გამოცხადებულ ადგილებში აკრძალულია რესტორნების მუშაობა, ხოლო ბავშვები კვლავ დისტანციურ რეჟიმში აგრძელებენ სწავლას.

• ვაქცინაცია

აღსანიშნავია, რომ აქტიურად მიმდინარეობს კორონავირუსის საწინააღმდეგო ვაქცინაცია. ვაქცინაცია 14 იანვარს დაწყო და დღემდე ვაქცინის პირველი დოზა 9.95 მილიონ ადამიანს აქვს მიღებული, ორივე დოზა კი - 7.24 მილიონზე მეტ ადამიანს.

თურქეთში იყენებენ კორონავირუსის საწინააღმდეგო ჩინური წარმოების Sinovac-ის ვაქცინას და როგორც ქვეყნის ჯანდაცვის მინისტრი, ფაჰრეთინ კოჩა აცხადებს, ქვეყანამ მიიღო 1,4 მილიონი დოზა "ფაიზერის“ ვაქცინა და ამავე წარმოების კიდევ 4,5 მილიონ დოზას ელოდებიან მიმდინარე თვეში.

გარდა ამისა, თურქმა მედიკოსებმა თავადაც შექმნეს კორონავირუსის საწინააღმდეგო ვაქცინები. ფაჰრეთინ კოჩას თქმით, მას აქვს მოლოდინი, რომ ზაფხულის ბოლოსთვის თურქეთი უკვე საკუთარი წარმოების ვაქცინებს გამოიყენებს.

"მჯერა, რომ პირველი ვაქცინა მზად იქნება აგვისტოსთვის, ზაფხულის ბოლომდე“, - აცხადებს ქვეყნის ჯანდაცვის მინისტრი. მისივე ინფორმაციით, ამჟამად ჯანდაცვის მსოფლიო ორგანიზაციაში კორონავირუსის საწინააღდმეგო 18 თურქული წარმოების კანდიდატი ვაქცინაა წარდგენილი.

ვირუსის გამოვლენის დღიდან ამ დრომდე თურქეთში კორონავირუსის 3,6 მილიონი შემთხვევა გამოვლინდა. ვირუსმა 32 456 ადამიანის სიცოცხლე იმსხვერპლა.