"მგონია, რომ ვიღაც არის დაინტერესებული, რომ ამ ადამიანმა ეს ილაპარაკოს" - რას ამბობს გიორგი კვირიკაშვილი აფგან მუხთარლის ბრალდებაზე

საქართველოს ყოფილი პრემიერ-მინისტრი, გიორგი კვირიკაშვილი აბსურდს უწოდებს აზერბაიჯანელი ჟურნალისტის, აფგან მუხთარლის ბრალდებას იმის შესახებ, რომ მისი (მუხთარლის) გატაცების შესახებ ინფორმირებული იყო მაშინდელი პრემიერ-მინისტრი გიორგი კვირიკაშვილი.

აღნიშნულის შესახებ ექსპერმიერმა "მთავარ არხთან“ ისაუბრა.

"პირველი, ეს არის სრული აბსურდი, აბსოლუტურად უსაფუძვლო ბრალდება და მეორე, მე ვიცი ზუსტად, რომ ეს ბრალდება აბსურდია და არ ვიცი, რატომ უნდა დავიჯერო ნებისმიერი სიტყვა, რომელსაც ეს ადამიანი ამბობს.

მესამე - მგონია, რომ საერთოდ ვიღაც არის დაინტერესებული, რომ ამ ადამიანმა ეს ილაპარაკოს. ალბათ, ამას დრო გამოაჩენს და გარკვეული დროის შემდეგ, როცა ეს გამოჩნდება, ალბათ მერე შემეძლება უფრო მეტი კომენტარის გაკეთება", - აღნიშნა კვირიკაშვილმა.

ცნობისთვის, აზერბაიჯანელი ჟურნალისტი აფგან მუხთარლი, რომელიც 2017 წელს თბილისიდან ბაქოში გაიტაცეს, საქართველოში ჩამოვიდა, მან განაცხადა, რომ გატაცებაში აზერბაიჯანულ მხარესთან ერთად, ქართული მხარეც მონაწილეობდა.

"ეს ქართულმა მხარემ აზერბაიჯანულთან ერთად ჩაიდინა, ინფორმირებული იყო ასევე მაშინდელი პრემიერ-მინისტრი გიორგი კვირიკაშვილი, ალბათ, იცოდა ივანიშვილმაც. თუ ფოტოებს მიჩვენებენ, თავდამსხმელებს ვიცნობ", - განაცხადა მუხთარლიმ.