სოფელ ლამბალოდან დაკარგული 18 წლის გოგო პოლიციამ იპოვა - არსებული ინფორმაციით, მან უარი თქვა არასასურველ ნიშნობაზე და სხვას გაჰყვა ცოლად

საგარეჯოს მუნიციპალიტეტის სოფელ ლამბალოდან დაკარგული 18 წლის გოგო პოლიციამ იპოვა. ინფორმაციას ადასტურებენ შინაგან საქმეთა სამინისტროში. როგორც Ambebi.ge-სთვის გახდა ცნობილი, ნარმინ ისაიევა მარნეულში იმყოფება და არა დანიშნულ, არამედ სხვა მამაკაცზე გათხოვდა.

ისაიევას ოჯახი და პოლიცია ორი დღე ეძებდა. ის სახლიდან 11 აპრილს გავიდა, რის შემდეგაც, დეიდას მოკლე ტექსტური შეტყობინება გაუგზავნა, სადაც ეწერა, რომ მისთვის სასურველ მამაკაცს გაჰყვა ცოლად.

დაკარგულის ოჯახის წევრებს ამ ვერსიის არ სჯეროდათ, რადგან მათი შვილი 6 თვის წინ მეზობელ სოფელში მცხოვრებ მამაკაცზე დაინიშნა. შემოდგომაზე კი ქორწილი ჰქონდათ დაგეგმილი.

ყოფილი საქმრო ოჯახს ახლა საცოლისთვის შეძენილი ნივთებისა და თანხის უკან დაბრუნებას სთხოვს. ოჯახის მხრიდან ოფიციალურად მიმართვის საფუძველზე, შინაგან საქმეთა სამინისტრომ საქმეზე გამოძიება თავისუფლების უკანონო აღკვეთის მუხლით დაიწყო.