"ნინუცა, ფაქტობრივად, გავაცოცხლეთ... უმძიმესი რაღაც აქვს გამოვლილი, შოკში ვარ გუშინდელი პოსტების შემდეგ" - რუსკა მაყაშვილი სტურუას და თეატრის პოზიციას ეხმაურება

მსახიობი რუსკა მაყაშვილი მისი დის სკანდალური ინტერვიუს შემდეგ რუსთაველის თეატრის პოზიციას აფასებს და ამბობს, რომ "იქ კრიტიკულ აზრს ახშობენ".

ამის შესახე მაყაშვილმა "ფორმულას" ეთერში განაცხადა და დასძინა, რომ არც ის და არც მისი ოჯახი, ბესო ზანგურის თეატრიდან გაშვებას არ ითხოვს.

"მეც ვარ რუსთაველის ეროვნული თეატრის მოქმედი მსახიობი და ვნახეთ ყველამ, გუშინ ამ თეატრის პოსტი, ძალიან ზოგადად დაგმეს ძალადობა... კიდევ ერთხელ ვმეორდები, არც მე, არც ჩემი და და არც ოჯახი არ ითხოვს არავისგან არაფერს, რომ ვინმე თეატრიდან გაუშვან. არც ჩივის ჩემი და და არაფერი.

წლებია ყველამ იცოდა ეს ყველაფერი. ნუ კი, ჩუმად ვიყავით ყველა, ისევ ნინუცას გამო. ნინუცა პატარა იყო, მაშინ სხვა პერიოდი იყო, ნინუცა, ფაქტობრივად, გავაცოცხლეთ.... და შემდეგ უკვე ვხვდებით ეროვნული თეატრის მთავარი სამხატვრო ხელმძღვანელის პოსტს.

გუშინდელი პოსტებისა და განცხადებების შემდეგ დაბნეული ვარ, შოკი მაქვს მიღებული. დაბნეული ვარ, არც კი ვიცი ამ ყველაფერზე რა უნდა ვთქვა. არსებობს მორალი და თუ ასე ფიქრობ, იქნებ საერთოდ გაჩუმდე, თუმცა ამ შემთხვევაში სიჩუმეც არასწორია. სხვადასხვა თეატრის მსახიობები დაუდგნენ ნინუცას გვერდით, თუმცა ეროვნულ თეატრში კრიტიკულ აზრს ახშობენ.

კიდევ ერთხელ ვამბობ, მე და ჩემი და არავისგან არაფერს ვითხოვთ. ვისაც ჩუმად ყოფნა უნდა იყოს, ვისაც ხმის ამოღება უნდა, ამოიღოს. ბოლო უნდა მოეღოს და ერთხელ და სამუდამოდ, რომ მოძალადე კაცები გაჩერდნენ, რომ ვიღაც კიდევ მსხვერპლი არ გახდეს იმისი, რისი მსხვერპლიც ჩემი და იყო. დამერწმუნეთ, უმძიმესი რაღაც აქვს ჩემს დას გამოვლილი" - აღნიშნა მაყაშვილმა.

ცნობისთვის, გადაცემა "ფარულ კონვერტში" ნინუცა მაყაშვილმა თქვა, რომ ყოფილ მეუღლესთან დაშორების მიზეზი ძალადობა იყო. როგორც მან აღნიშნა, ბესო ზანგური მას ფიზიკურადაც უსწორდებოდა და ამ ყველაფერს თავი გაქცევით დააღწია. ბესო ზანგურმა ყოფილი მეუღლის ბრალდებები უარყო და მას სასამართლოში ჩივილით დაემუქრა.