სოციალური დისტანცია და მხოლოდ 30 ადამიანი სამლოცველოში - პრინც ფილიპეს დაკრძალვა კოვიდრეგულაციების დაცვით ჩატარდა

პრინცი ფილიპი უინძორის სასახლეში მდებარე წმინდა გიორგის სამლოცველოში დაკრძალეს. ედინბურგის ჰერცოგის დაკრძალვის ცერემონიალი კორონავირუსის გამო დაწესებული წესების დაცვით ჩატარდა. ღონისძიებას შეიარაღებული ძალების 730-ზე მეტი წევრი ესწრებოდა, თუმცა წმინდა გიორგის სამლოცველოში მხოლოდ 30 ადამიანი იმყოფებოდა.

დაკრძალვებზე დამსწრეები სოციალურ დისტანციას იცავდნენ. პანაშვიდის დაწყებამდე გაერთიანებული სამეფოს მოქალაქეებმა მთელი ქვეყნის მასშტაბით პრინც ფილიპის ხსოვნას წუთიერი დუმილით მიაგეს პატივი.

ცერემონიალური გასროლა გაერთიანებულ სამეფოსა და გიბრალტარში ცხრა სხვადასხვა ადგილას ერთდროულად განახორციელეს, რითაც წუთიერი დუმილის დასაწყისი და დასრულება აღინიშნა.

შეგახსენებთ, პრინცი ფილიპი 9 აპრილს, 99 წლის ასაკში გარდაიცვალა.