რატომ აღარ გვხვდება ფასდაკლებული პროდუქტი სუპერმარკეტების დახლებზე აქციის დროს?

თითქმის ყველა ჩვენგანს ჰქონია შემთხვევა, როცა სასურველი პროდუქტის, ნივთის შესაძენად, აქციას ელოდები, თუმცა როცა ეს დღე დგება, სამსახურის, ბავშვის ან სხვა მიზეზის გამო მაღაზიაში მისვლას აგვიანებ, საღამოს კი ფასდაკლებული პროდუქცია აღარ გხვდება... მართლაც ძალიან გამაღიზიანებელია, ხომ?!

ასეთი შემთხვევები გვაქვს სასურსათო მარკეტებში, როცა ფასდაკლებების დროს იშვიათად აღმოვჩნდებით ხოლმე იმ იღბლიანთა შორის, ვინც სააქციო პროდუქტის შეძენას ახერხებს. მაღაზიაში მისულებს გვეუფლება განცდა, თითქოს ისეთი რაღაც დავკარგეთ, რაც აუცილებლად უნდა მიგვეღო, უკმაყოფილებას კი კონსუტანტებთან გამოვხატავთ, რომელთა ვალდებულებასაც მხოლოდ საწყობიდან თაროზე პროდუქციის განთავსება წარმოადგენს და არა მომწოდებლისგან ტრანსპორტირება. ამგვარი შემთხვევების შესახებ პოსტები ხშირად იწერება „ფეისბუქშიც“, სადაც სპეციალური ჯგუფებია შექმნილი იმისათვის, რომ უკმაყოფილო მომხმარებლებმა თავიანთი პოზიცია დააფიქსირონ და შემთხვევის შესახებ ფართო საზოგადოებას უამბონ. რეალურად, სასურსათო მარკეტები გაყიდვებზე არიან ორიენტირებულები და ცდილობენ, პროდუქცია უწვეტი რეჟიმით მიეწოდებოდეს ქსელს და რაც შეიძლება, მეტი კმაყოფილი მომხმარებელი ჰყავდეთ, თუმცა მარაგების შევსება ბოლომდე მათზე არ არის დამოკიდებული და ამ პროცესში მიმწოდებლებიც დიდ როლს თამაშობენ.

რატომ აღარ გვხვდება ფასდაკლებული პროდუქტის მარაგი შევსებული და რატომ იწურება ის სწრაფად აქციის დროს?

ამის გასარკვევად „რითეილ ასოციაციას“ დავუკავშირდით, რომელიც 12 ქსელურ სასურსათო მარკეტს აერთიანებს. როგორც ასოციაციაში დაგვიდასტურეს, ამგვარი შემთხვევები მართლაც ხდება, მომხმარებლები კი როგორც წესი, უკმაყოფილებას სუპერმარკეტის მიმართ გამოთქვამენ. მათივე თქმით, სამწუხაროა, რომ გაბრაზებული მომხმარებელი მხოლოდ სუპერმარკეთს სდებს ბრალს, ამ დროს კი პროდუქციის მიწოდების წყვეტას ბევრი ფარული პროცესი განაპირობებს, რომლის შესახებ ცნობიერების ამაღლება მომხმარებელში მნიშვნელოვანია.

• მომარაგების პრობლემა - ანუ მომწოდებლის მხრიდან არ/ვერ მოხდა დროული მომარაგება;
• ძალიან დიდი მოთხოვნა იყო პროდუქციაზე და მარაგი ამოიწურა. მომხმრებლისთვის საინტერესო პროდუქციაზე, რაც უფრო ღრმა ფასდაკლებაა, უფრო დიდია მოთხოვნაც, რომელიც სააქციო პროდუქციის მარაგების პრობლემას ქმნის;
• ასევე, მიზეზი შეიძლება იყოს გარემო პირობები, პირობითად საზღვრების ჩაკეტვა და პროდუქციის დროულად ვერ მიღება;
• გარკვეული რეგულაციებიც, რომელიც სააქციო პროდუქციის წყვეტას განაპირობებს.

„როგორც აღვნიშნეთ სააქციო პროდუქციის წყეტაზე სხვადასხვა ფასტორი ახდენს ზეგავლენას და უკმაყოფილების მხოლოდ მაღაზიის პერსონალზე გადატანა არ იქნება სწორი. მუდმივად ვმუშაობთ, რათა გაზრდილ მოთხოვნას ვუპასუხოთ და სააქციო პროდუქცია დახლზე არ ამოიწუროს. ჩვენთვის მომხარებელი და მისი კმაყოფილება განაპირობებს ჩვენი სექტორის წარმატებას, ამიტომ ყველა ქსელი მაქსიმუმს აკეთებს მომხმარებლის მოლოდინების დასაკმაყოფილებლად “, - აღნიშნეს „რითეილ ასოციაციაში“.

პროდუქტების მიწოდების უწყვეტობა პრობლემას წარმოადგენს არამხოლოდ საქართველოში, არამედ სხვა ქვეყნებშიც, თუმცა სადისტრიბუციო ჯაჭვის გამართვა ბუნებრივია, მომხმარებლისთვის აღნიშნულ პრობლემას მნიშვნელოვნად მოაგვარებს.