რა ეტაპზეა კორონავირუსის საწინააღმდეგო აბებზე მუშაობა - Pfizer-ი ცდის წამალს, რომელიც შესაძლოა, ადამიანებმა, წლის ბოლოს, სახლის პირობებშიც მიიღონ

კორონავირუსის პანდემიას მსოფლიო უკვე ერთ წელზე მეტია ებრძვის. ამ დროისთვის ფართო გამოყენებაში ჩაშვებულია ვირუსის საწინააღმდეგო არაერთი ვაქცინა, თუმცა ჯერჯერობით არ არსებობს წამალი, აბები Covid-19-ის წინააღმდეგ.

ანტივირუსულ პრეპარატზე სხვადასხვა ფარმაკოლოგიური კომპანიები მუშაობენ და მათ შორის, ამ ეტაპზე ყველაზე იმედის მომცემად Pfizer-ის მეცნიერების მიერ შექმნილ წამალს მიიჩნევენ, რომელზეც კლინიკური კვლევები მიმდინარებს და თუ ყველაფერი წარმატებით დასრულდება, შესაძლოა, ვირუსთან ბრძოლაში აღნიშნული წამალი გარდამტეხიც კი აღმოჩნდეს.

• მედიკოსებს იმედი აქვთ, რომ ეს პრეპარატი პანდემიის დასრულების გზაზე უმნიშვნელოვანეს როლს შეასრულებს.

როგორც ბრიტანული გამოცემა, "ტელეგრაფი" წერს, Pfazer-ი აშშ-სა და ბელგიაში ატარებს კლინიკურ კვლევას, რომლის ფარგლებშიც კორონავირუსის საწინააღმდეგო აბებს უკვე ცდიან ადამიანებზე. კვლევაში ჩართულია 60 მოხალისე, რომელთა ასაკიც 18-დან 60 წლამდეა. წამალი სპეციალურად SARS-CoV-2-ის საწინააღმდეგოდაა შექმნილი.

"ტელეგრაფის“ ცნობით, თუ კვლევა წარმატებული იქნება, შესაძლებელი გახდება, რომ კორონავირუსის სამკურნალო საშუალება სახლის პირობებში უკვე წლის ბოლოსთვის იყოს ხელმისაწვდომი.

ანტივირუსულ წამალს ამ დროისთვის კოდირებულ სახელს - PF 07321332-ს უწოდებენ. მეცნიერების განმარტებით, ვირუსის პირველი სიმპტომების გამოვლენის შემდეგ, წამალმა ორგანიზმში ვირუსის გავრცელება უნდა შეაჩეროს. პროფესორი პენი ვარდი ამბობს, რომ ამ ეტაპზე არსებული მონაცემები ოპტიმიზმის საფუძველს იძლევა.

კორონავირუსის საწინააღმდეგო ანტივირუსულ პრეპარატზე Pfizer-ის მეცნიერები ვირუსის გავრცელების საწყისი ეტაპიდანვე მუშაობენ.

"ჩვენ შევქმენით კორონავირუსის პოტენციური საწინააღმდეგო წამალი, აბები, რომელიც უნდა დაინიშნოს ინფექციის პირველივე სიმპტომების გამოვლენის დროს, იმ პაციენტებში, რომელთა მდგომარეობაც არ არის კრიტიკული“, - ნათქვამია "ფაიზერის“ ოფიციალურ განცხადებაში.

აღსანიშნავია, რომ წამალმა კვლევის რამდენიმე ფაზა უნდა გაიაროს იმისთვის, რომ ფართო მოხმარებაში ჩაეშვას. კვლევის შედეგი, რომელიც მის 60 მოხალისეში გამოცდას გულისხმობს, მაისის ბოლოს უნდა გახდეს ცნობილი, ხოლო თუ წამალი ეფექტიანი იქნება კორონავირუსთან საბრძოლველად, წლის ბოლოსთვის შესაძლოა, მისი გამოყენება ადამიანებმა სახლის პირობებში შეძლონ.

ცნობისთვის, კორონავირუსის საწინააღმდეგო მედიკამენტი ისრაელშიც შექმნეს და წამალი ამ დროისთვის კვლევის ფაზაშია.

კორონავირუსის პანდემიას, ბოლო მონაცემებით, ვირუსის გამოვლენიდან ამ დრომდე, ოფიციალური ცნობებით, 3,1 მილიონი ადამიანი ემსხვერპლა, საერთო ჯამში კი 148,5 მილიონი ადამიანი დაინფიცირდა.