ავტორი:

"შვეიცარიულმა ბანკმა ქართველი მილიარდერის წინააღმდეგ სასამართლოში სარჩელი შეიტანა“ - რას ედავებიან ბიძინა ივანიშვილს?

"შვეიცარიულმა ბანკმა ქართველი მილიარდერის წინააღმდეგ სასამართლოში სარჩელი შეიტანა“ - რას ედავებიან ბიძინა ივანიშვილს?

ამერიკული გამოცემის «Forbes»-ის რუსულენოვანი ვერსიის ვებსაიტზე გამოქვეყნდა სტატია, სათაურით: "შვეიცარიის ბანკმა ქართველი მილიარდერის წინააღმდეგ სასამართლოში სარჩელი შეიტანა“ (ავტორი - რინატ ტაიროვი). პუბლიკაციაში ლაპარაკია იმაზე, თუ რატომ უჩივის ბანკი Credit Suisse ბიძინა ივანიშვილს და იმ პიარ-კომპანიებს, რომლებიც მას კონსულტაციებს უწევდნენ.

გთავაზობთ სტატიას მცირე შემოკლებით:

საქართველოს უმდიდრესი ადამიანი, მილიარდერი ბიძინა ივანიშვილი მოპასუხე გახდა ლონდონის სასამართლოში ბანკ Credit Suisse-ს მიერ წარდგენილ სარჩელთან დაკავშირებით. საქმე იმაშია, რომ ბანკი უკმაყოფილოა სასამართლოს მიერ გასაიდუმლოებული ანგარიშის პუბლიკაციით, რომელიც მის ყოფილ თანამშრომელს შეეხება - მდიდარი ინვესტორების ფულთან დაკავშირებული თაღლითობის გამო მსჯავრდებულს.

ამერიკული სააგენტო "ბლუმბერგის" (Bloomberg) ცნობით, შვეიცარიის ბანკმა Credit Suisse-მ ლონდონის სასამართლოში სარჩელი წარადგინა ქართველი ბიზნესმენის ბიძინა ივანიშვილისა და სხვა ინვესტორების მიმართ, რომლებმაც ფული დაკარგეს ბანკის ყოფილი მენეჯერის პატრის ლესკოდრონის მოქმედების გამო. სარჩელი ასევე ეხება იმ PR-კომპანიებსაც, რომლებმაც ბიძინა ივანიშვილს და სხვა ინვესტორებს კონსულტაციას უწევდნენ. სასამართლო პროცესი 29 აპრილს იწყება ლონდონში.

ბანკს სურს მილიარდერისა და სხვა მოპასუხეების დასჯა იმისთვის, რომ მათ გადაწყვიტეს და გამოაქვეყნეს შვეიცარიის საბანკო რეგულატორის (FINMA) ანგარიშის ასლი თაღლითობისთვის მსჯავრდებულ პატრის ლესკოდრონის შესახებ. "ანგარიშიდან ცნობილი გახდა, რომ Credit Suisse-მ იცოდა თავისი თანამშრომლის მიერ ჩადენილი დარღვევების შესახებ, თანაც მის მიმართ ბრალდების წაყენებიდან რამდენიმე წლით ადრე“, - წერდა გაზეთი The Wall Street Journal. ანგარიში გამოქვეყნდა მიმდინარე წლის თებერვალში საიტზე CSVictims.com.

როგორც "ბლუმბერგი“ აღნიშნავს, დასახელებული პორტალი PR-სააგენტო Metigen-ის მიერ იმართება. სააგენტოს დირექტორი ჩარლი უიგანი ყურადღებას ამახვილებს იმაზე, რომ დავა მიდის FINMA-ს ანგარიშის და არა Credit Suisse-ს ირგვლივ. თუმცა დოკუმენტის შინაარსი საზოგადოების ინტერესს იწვევს Credit Suisse-ს იმ დანაკარგების გათვალისწინებით, რომელიც ბანკმა განიცადა ჰეჯ-ფონდ Archegos Capital-ის კრახის გამო.

Credit Suisse-მა უარი განაცხადა "ბლუმბერგ“-ის მიერ გავრცელებული ინფორმაციის კომენტირებაზე. ასევე მოიქცა FINMA-ს წარმომადგენელიც.

აღსანიშნავია, რომ Credit Suisse-მა ანგარიშის გამოქვეყნებამდე დაარწმუნა სასამართლო, რომ დოკუმენტი გაესაიდუმლოებინა. ალბათ, PR-სააგენტო Metigen-ი შეეცდება სასამართლოს იმ დადგენილების გაუქმებას დოკუმენტის პუბლიკაციის აკრძალვის თაობაზე, რომელიც PR-სააგენტოს CSVictims-ის საიტიდან დოკუმენტის აღებას ავალდებულებს. თავის მხრივ, Credit Suisse ცდილობს, რომ გასაიდუმლოების თაობაზე სასამართლოს მიერ მიღებული დადგენილების მოქმედების ვადა კიდევ გაგრძელდეს, - განმარტავს "ბლუმბერგი“.

ბიძინა ივანიშვილი ერთ-ერთი მოპასუხეა ლონდონის სასამართლოში. იგი სხვა ინვესტორებთან ერთად დაზარალდა პატრის ლესკოდრონის მოქმედებით და მიიჩნევს, რომ ბანკმა ნაწილობრივად მაინც უნდა აგოს პასუხი თავისი ყოფილი მენეჯერის ქცევის გამო.

პატრიკ ლესკოდრონს 2018 წელს ხუთი წლით თავისუფლების აღკვეთა მიესაჯა თაღლითობისა და დოკუმენტების გაყალბების გამო. მენეჯერმა აღიარა, რომ თავისი კლიენტების ხელმოწერებს აყალბებდა, რათა მათი ფულის საფუძველზე გარიგებები დაედო ისე, რომ მათ არაფერი სცოდნოდათ. ამ გარიგებებზე მენეჯერმა საბოლოოდ 150 მილიონი დოლარი დაკარგა, - წერდა The Wall Street Journal ჟენევის სისხლის სამართლის სასამართლოს მონაცემებზე დაყრდნობით. FINMA-მ 2018 წელს Credit Suisse გააკრიტიკა იმის გამო, რომ ბანკი არსაკმარის ზედამხედველობას და კონტროლს ახორციელებდა თავისი თანამშრომლის მოქმედებაზე.

Credit Suisse აცხადებდა, რომ პატრის ლეკოდრონის თაღლითობის შესახებ მხოლოდ 2015 წლის სექტემბერში გაიგო, მაგრამ FINMA-ს მიერ 2016 წელს მომზადებული საიდუმლო ანგარიშით ირკვევა, რომ ბანკირის მოქმედება 2009 წლიდან 2015 წლამდე ასობით შენიშვნას იწვევდა, რომელიც Credit Suiss-მა სათანადოდ არ შეამოწმა. ამის გარდა, Credit Suisse-ს ათობით სხვა მენეჯერმა იცოდა პატრის ლესკოდრონის მხრიდან წესების დარღვევის თაობაზე, მაგრამ უმოქმედოდ იყვნენ ან მხოლოდ რბილ სასჯელს მიმართავდნენ. ეს იმიტომ, რომ მენეჯერს ბანკისთვის ყოველწლიურად 25 მილიონამდე ამონაგები თანხა მოჰქონდა, - წერდა ამერიკული გაზეთი.

ბიძინა ივანიშვილი პატრის ლესკოდრონის კლიენტი იყო. მან Credit Suisse-ს მიმართ სარჩელი წარადგინა როგორც სინგაპურში, ასევე ახალ ზელანდიაში და ბერმუდის კუნძულებზე 800 მილიონი დოლარის საერთო მოცულობით. "ბლუმბერგი“ ივანიშვილს ლესკოდრონის ყველაზე მსხვილ მსხვერპლად მიიჩნევდა. თვითონ ბიზნესმენი "ბლუმბერგისადმი" მიცემულ ინტერვიუში ამბობდა, რომ ლესკოდრონს თვითონ, მარტო, არ შეეძლო Credit Suisse-ში ასეთი [თაღლითური] სქემის ორგანიზება. მილიარდერი აღნიშნავდა, რომ მას ბიზნესი ჰქონდა "ველურზე ველურ რუსეთში და ქართულ ბანკებში, მაგრამ Credit Suisse-ის მსგავსი არსად უნახავს".

2018 წელს პატრის ლესკოდრონმა თავისი მოქმედება შიშით ახსნა. იგი ამბობდა, რომ 2008 წლის ფინანსური კრიზისის დროს თავისი ზარალის დაფარვა კლიენტების ფულით დაიწყო და მას შემდეგ გამჟღავნებისა ეშინოდა, - წერდა "ბლუმბერგი“. ლესკოდრონი 2019 წელს გაათავისუფლეს. 2020 წლის ივლისში კი მან სიცოცხლე თვითმკვლელობით დაასრულა.

როგორც Forbes Real-Timeს რეიტინგი გვიჩვენებს, ბიძინა ივანიშვილს ამჟამად საქართველოს უმდიდრეს ბიზნესმენებს შორის პირველი ადგილი უკავია, მსოფლიოში კი 613-ე. რეიტინგის განახლება რეალური დროის რეჟიმში ხდება. ბიზნესმენის ქონება 4,8 მილიარდ დოლარად არის შეფასებული.

წყარო

ვინ არის ახალგაზრდა, რომელიც თელავში, ე.წ. კომენდანტის საათისას მომხდარი ავარიისას გარდაიცვალა

სოფელ დიღომში სროლის შედეგად 4 პირი დაიჭრა

"ეშმაკი დეტალებშია... პრაქტიკულად სახურავიდან გადმომაძვრინეს, რომ ეს აურზაური მომხდარიყო" - ნიკა მელიამ საპატიმრო უკანა გასასვლელით დატოვა