რა ინფორმაციას ავრცელებს საბერძნეთში საქართველოს საელჩო?

ბერძნული მედიის ინფორმაციით, საბერძნეთში 36 წლის ქართველი მამაკაცი იმ დროს დააკავეს, როცა ქვეყნის დატოვებას ყალბი პასპორტით ცდილობდა. ბერძნული გამოცემის ცნობით, ქართველი, რომლის ვინაობასაც ამ ეტაპზე არ ახმაურებენ, 7 მარტს, საბერძნეთში მომხდარ ძარცვაში მონაწილეობდა. მაშინ დამნაშავეებმა მოხუცი წყვილი გაკოჭეს და ცემეს. სამართალდამცავების განცხადებით, დაკავებული მონაწილეობდა კიდევ ერთ შემზარავ დანაშაულში, როდესაც ახალგაზრდა ცოლ-ქმარი ჯგუფურად დააყაჩაღეს და 20 წლის გოგო მეუღლისა და ჩვილის თანდასწრებით გაგუდეს.

მომხდართან დაკავშირებით განცხადებას "ფეისბუქის" ოფიციალურ გვერდზე ავრცელებს საქართველოს საელჩო საბერძნეთში.

"საზოგადოების მაღალი ინტერესიდან გამომდინარე, საქართველოს საელჩო ათენში გაცნობებთ, რომ ატიკის პოლიციის გენერალური დეპარტამენტის ინფორმაციით, 20 წლის ახალგაზრდა ქალის მკვლელობის ბრალდებით, ამ დროისთვის, საქართველოს არცერთი მოქალაქე დაკავებული არ არის", - ვკითხულობთ გავრცელებულ განცხადებაში, თუმცა აღსანიშნია, რომ ადგილობრივი მედიის ინფორმაციით, დაკავებულ ქართველს სამართალდამცავები იმ ჯგუფურ ყაჩაღობაში ეჭვმიტანილად მიიჩნევენ, რომლის დროსაც 20 წლის გოგონა მოკლეს.