"ინფიცირების ახალი შემთხვევების თითქმის 75% "ინდურ ვარიანტთან" არის დაკავშირებული" - რა ინფორმაციას ავრცელებს დიდი  ბრიტანეთის ჯანდაცვის მინისტრი

გაერთიანებულ სამეფოში, გასული კვირის განმავლობაში, კორონავირუსის ინდური ვარიანტით ინფიცირების 3 535 ახალი შემთხვევა გამოვლინდა და აღნიშნული შტამით ინფიცირებულთა საერთო რაოდენობამ 6 959-ს მიაღწია, - შესაბამის მონაცემებს ინგლისის საზოგადოებრივი ჯანდაცვა ავრცელებს. ამასთან, ინფორმაცია დაადასტურა გაერთიანებული სამეფოს ჯანდაცვის მინისტრმა მეთ ჰენკოკმა და განაცხადა, რომ ქვეყანაში ინფიცირების ახალი შემთხვევების თითქმის 75% „ინდურ ვარიანტთან“, B.1.617.2-სთან არის დაკავშირებული.

ინდური ვარიანტის გავრცელებამ კითხვები წამოჭრა იმასთან დაკავშირებით, შეძლებს თუ არა ბრიტანეთის მთავრობა ინგლისში „ლოქდაუნის“ სრულ გაუქმებას დაგეგმილისსამებრ, 21 ივნისს. ჰენკოკის განცხადებით, ძალიან ადრეა იმის თქმა, მოიხსნება თუ არა შეზღუდვები.

„პამდემია ჯერ არ დასრულებულა”, - აღნიშნა მინისტრმა და დასძინა, რომ ამას „ინდური ვარიანტით“ ინფიცირების შემთხვევების ზრდაც ადასტურებს.

შეგახსენებთ, „ინდური ვარიანტის“ გავრცელების პრევენციის მიზნით საფრანგეთის ხელისუფლებამ გაერთიანებული სამეფოდან ქვეყანაში შესვლა შეზღუდა. კერძოდ, 31 მაისიდან ყველა მოქალაქე, რომელიც ქვეყანაში გაერთიანებული სამეფოდან შევა, ვალდებული იქნება 7-დღიანი კარანტინი გაიაროს. მანამდე, გაერთიანებული სამეფოდან მგზავრობაზე შეზღუდვები დააწესეს გერმანიამ და ავსტრიამაც. კერძოდ, ქვეყნიდან გერმანიაში ჩასულ მგზავრებს ორკვირიანი კარანტინის გავლა უწევთ, ავსტრია კი 1-ელი ივნისიდან გაერთიანებული სამეფოდან პირდაპირ ავიარეისებს აკრძალავს.