"რუსთავი 2"-ზე დავით კიკალიშვილი ბრუნდება  - რა სიახლეები გელოდებათ ახალი სეზონიდან და როგორ აღნიშნა არხმა 27 წლის იუბილე?

1 ივნისი "რუსთავი 2“-ის დაბადების დღეა. ტელეკომპანიას დღეს 27 წელი შეუსრულდა. "რუსთავი 2"-ს წლების განმავლობაში არაერთი ნიჭიერი ადამიანი ქმნიდა... არხმა დღეს იუბილე კომპანიის ეზოში თანამშრომლებისთვის გამართული ღონისძიებით აღნიშნა. არხის ოპერატორები და მემონტაჟეები 1 ივნისისთვის ტრადიციულად ემზადებიან, მონაწილეობენ კონკურსში, რომელიც საუკეთესო კადრის ავტორებს ავლენს.

დღეს საუკეთესო კადრის ავტორებს ოპერატორ გოჩა რამიშვილის ჯილდო გადასცეს (გოჩა რამიშვილი წლების წინ კადრის გადაღებისას ტრაგიკულად დაიღუპა). არხის მთავრ ღონისძიებაზე გოჩას პრიზის 7 ნომინანტი და 7 გამარჯვებული გამოვლინდა - საუკეთესო მონტაჟი, ყველაზე სარისკო კადრი, საუკეთესო "სთენდაფი". ეს არასრული ჩამონათვალია ნომინაციების, რომელშიც "რუსთავი 2"-ის საუკეთესო თანამშრომლები დაჯილდოვდნენ და წამახალისებელი პრიზებით დასაჩუქრდნენ.

ნიკა ლებანიძე, ოპერატორი, ჟურნალისტი:

- ჩემთვის "რუსთავი 2"-ში მუშაობა გოჩა რამიშვილთან ასოცირდება, აქ თავის დროზე გოჩამ მომიყვანა და იმის მერე აქ ვარ "გამაგრებული". რაც შეეხება ამ დაჯილდოებას, მასში რაც უფრო მეტი ოპერატორი, მემონტაჟე მიიღებს მონაწილეობას, სამომავლოდ უკეთესი იქნება.

ნიკოლოზ რთველიაშვილი, ოპერატორი:

- 20 წელია, "რუსთავი 2“-ის თანამშრომელი ვარ. არასდროს მიმიღია ამ კონკურსში მონაწილება. როგორც იქნა, გადავწყვიტე და პირველივე ცდაზე გამიმართლა და საუკეთესოებში მოვხვდი.

სალომე ბოკუჩავა, ჟურნალისტი:

- გამოცხადდა, რომ ვარ ყველაზე თავდადებული თანამშრომელი. არ ვიცი, რით დავისახურე, იმ ოპერატორების, ჟურნალისტების გვერდით, ვინც "კურიერს" ქმნიან, წლების ისტორიას აგროვებენ და ამ არხის ბოიოგრაფიას წერენ... აქ მუშაობის პერიოდში ეს არის პირველი ჯილდო, რომელიც დავიმსახურე და ძალიან ამაყი ვარ... "რუსთავი 2" ჩემთვის არის სახლი, სადაც დიდ დროს ვატარებ.

ცნობილი გახდა, რომ არხი მუშაობას ახალი სეზონისთვის ახალი გადაცემებითა და ლიცენზირებული პროექტებით დაიწყებს, რისთისაც ინტენსიურად ემზადება.

''რუსტავი 2''-ის სატელევიზიო ბადეში ბრუნდება "P.S.", რომელსაც არხის ცნობილი ჟურნალისტი გურამ როგავა, დავით კიკალიშვილის მონაწილეობით წაიყვანს. დავით კიკალიშვილი, როგორც ამბობენ, მათი "ევროპული სახე" იქნება. არხისთვის ერთ-ერთი მთავარი სიახლე ისაა, რომ ეთერში რეიტინგული შოუ "ნიჭიერი" ბრუნება.