ილჰამ და მეჰრიბან ალიევებმა ერდოღანს მთიან ყარაბაღში უმასპინძლეს - პომპეზური ღონისძიება შუშაში და აზერბაიჯანის პირველი ლედის შთამბეჭდავი სტილი (ფოტოები)

აზერბაიჯანს თურქეთის პრეზიდენტი, მეუღლესთან ერთად ესტუმრა. მაღალი რანგის სტუმრებს მთიან ყარაბაღში, ქალაქ შუშაში უმასპინძლეს, სადაც ილჰამ ალიევმა და რეჯეფ თაიფ ერდოღანმა ხელი მოაწერეს დეკლარაციას სამოკავშირო ურთიერთობების შესახებ.

"ეს დეკლარაცია წამოწევს ჩვენ ურთიერთობებს ყველაზე მაღალ დონეზე. დღეისთვის ჩვენ შევქმენით ხარისხობრივად ახალი კავშირი და ამ დეკლარაციის ყველა პუნქტი წარმოადგენს გარანტიას ჩვენი სამომავლო თანამშრომლობისთვის“, - განაცხადა ილჰამ ალიევმა თურქეთის ლიდერთან შეხვედრის შეჯამებისას.

მან ხაზი გაუსვა, რომ აზერბაიჯანი და თურქეთი მსოფლიო არენაზე წარმოადგენენ ყველაზე ახლოს მყოფ ქვეყნებს, რომელთა ერთობა აიხსნება ისტორიით, კულტურით, საერთო ეთნიკური ფესვებით, ენით, რელიგიით და ეროვნული ფასეულობებითა და ინტერესებით.

მისი თქმით, შუშის დეკლარაციის უმნიშვნელოვანესი პუნქტებია აზერბაიჯანისა და თურქეთის თანამშრომლობა თავდაცვით სფეროში.

"დეკლარაციაში ასახულია მნიშვნელოვანი საკითხები, ისეთები, როგორებიც არის თანამშრომლობა საერთაშორისო დონეზე, პოლიტიკური, ეკონომიკური, სავაჭრო ურთიერთობები, კულტურა, განათლება, სპორტი, ენერგეტიკული უსაფრთხოება, სამხრეთის გაზის დერეფნის მნიშვნელობა. ყველა საკითხი ძალიან მნიშვნელოვანია, მაგრამ ორ მათგანზე შევჩერდებოდი. ეს არის აზერბაიჯანისა და თურქეთის თანამშრომლობა თავდაცვით წარმოებაში და ურთიერთ სამხედრო დახმარება“, - განაცხადა ალიევმა. მან დოკუმენტის ხელმოწერას ისტორიული მიღწევა უწოდა.

შეხვედრაზე ერდოღანმა განაცხადა, რომ თურქეთი შუშაში საკონსულო განყოფილებას გახსნის.

ორი ქვეყნის პირველი პირები შუშაში მეუღლეებთან ერთად იმყოფებოდნენ. ისინი დაესწრნენ სპეციალურად ამ დღისთვის გამართულ ღონისძიებებს. ფოტოები კი სოციალურ ქსელში გამოაქვეყნეს.

განსაკუთრებული ყურადღება მიიპყრო აზერბაიჯანის პირველმა ლედიმ მეჰრიბან ალიევამ, რომელიც ტრადიციულად, შესანიშნავ ფორმაში იყო. მისი ახალი ფოტოები ინტერნეტჰიტად იქცა და არაერთი კომპლიმენტიც მიიღო.