იტალიელმა პროფესორმა G20-ის მონაწილეებს "შოუ მოჰპარა“ - წელს ზემოთ შიშველი ნიკოლა ფრანჯიონეს ფოტოები, რომელსაც პოლიტიკოსებმა მყუდროება დაურღვიეს

29 ივნისს დიდი ოცეულის ქვეყნების წარმომადგენლები იტალიაში სხვადასხვა საკითხების განსახილველად შეიკრიბნენ. G20-ს იტალიის სამხრეთით მდებარე ქალაქმა მატერამ უმასპინძლა.

ქალაქის ქუჩაში ერთად შეკრებილ პოლიტიკოსებს კი იტალიელმა პროფესორმა ნიკოლა ფრანჯიონემ "შოუ მოჰპარა.“

უჩვეულო შემთხვევის წყალობით, ფრანჯიონეს ახლა მთელი მსოფლიო იცნობს და უფრო მეტიც, ადამიანები სახლთან აკითხავენ და სელფების გადაღებას სთხოვენ.

ყველაფერი კი ასე მოხდა, ნიკოლა ფრანჯიონე სახლში ისვენებდა, ყავას მიირთმევდა და წიგნს კითხულობდა, როდესაც მახლობლად G20-ის დელეგაციის წარმომადგენლები იყვნენ. ხმაურზე წელს ზემოთ შიშველმა პროფესორმა აივნიდან გადმოიხედა და ყველას ყურადღება მიიპყრო.

"უბრალოდ ვისვენებდი, სახლში ვიყავი და წიგნს ვკითხულობდი, ისე, როგორც ამას ხშირად ვაკეთებ. როდესაც ხმაური შემომესმა, გარეთ გავიხედე. შევამჩნიე, რომ ყველას ყურადღება მივიქციე და მხოლოდ მაშინ მივხვდი, რომ წელს ზევით შიშველი ვიყავი.

იქ მინისტრები იყვნენ, მიღიმოდნენ და მესალმებოდნენ. შემდეგ ვიღაცამ ფოტო გადაიღო, რომელიც ვირუსულად გავრცელდა. დღეს ყველა სელფის გადაღებას მთხოვს“, - ამბობს პროფესორი.