რაზე შეთანხმდნენ ვლადიმერ პუტინი და ჯო ბაიდენი?

რუსეთის პრეზიდენტის, ვლადიმერ პუტინის განცხადებით, ამერიკელ კოლეგასთან შეხვედრისას გადაწყდა, რომ ამერიკელი და რუსი ელჩები საკუთარი საქმიანობის ადგილებს დაუბრუნდებიან. ამის შესახებ მან ჟენევაში აშშ-ის პრეზიდენტ ჯო ბაიდენთან გამართული შეხვედრის შემდეგ განაცხადა.

"რაც შეეხება ელჩების დაბრუნებას საკუთარი საქმიანობის ადგილზე, მოსკოვში ამერიკელი ელჩებისა, ხოლო ვაშინგტონში რუსი ელჩებისა, ჩვენ შევთანხმდით, რომ ეს საკითხი გადაწყვეტილია. ისინი დაუბრუნდებიან საკუთარ საქმიანობის ადგილებს, ხოლო კონკრეტულად როდის, იქნება ეს ხვალ თუ ზეგ, არის წმინდად ტექნიკური ხასიათის საკითხი.

ასევე შევთანხმდით, რომ რუსეთის საგარეო საქმეთა სამინისტრო და აშშ-ის სახელმწიფო დეპარტამენტი, დაიწყებენ კონსულტაციებს კომპლექსურად დიპლომატიური კუთხით ურთიერთქმედებებისთვის. აქ არის სასაუბრო, დაგროვდა ბევრი თემა. მგონია, რომ ორივე მხარე, მათ შორის აშშ განწყობილია, რომ იპოვოს გამოსავალი“, - აღნიშნა, პუტინმა.

მისივე განცხადებით, ამერიკელ კოლეგა ჯო ბაიდენთან შეხვედრისას, უკრაინის საკითხი განიხილეს.

როგორც მან შეხვედრის შემდეგ პრესკონფერენციაზე განაცხადა, ჯო ბაიდენი თანხმდება, რომ აღმოსავლეთ უკრაინის საკითხი ძირითადად მინსკის მოლაპარაკებებით უნდა დარეგულირდეს.

„რაც ეხება უკრაინას, ამას შეეხო საუბარი. ვერ ვიტყოდი, რომ ძალიან დეტალურად. მაგრამ როგორც მივხვდი პრეზიდენტი ბაიდენი ეთანხმება, რომ უკრაინის აღმოსავლეთში ძირითადი დარეგულირება უნდა მოხდეს მინსკის შეთანხმებით“, - განაცხადა პუტინმა.

რაც შეეხება უკრაინის ნატო-ში შესაძლო გაწევრიანების საკითხს, რუსეთის პრეზიდენტმა აღნიშნა, რომ აქ არაფერია განსახილველი.

„რაც შეეხება საკითხს უკრაინის ნატოში შესაძლო შესვლაზე, ამ თემას შევეხეთ გაკვრით და აქ არაფერია განსახილველი“, - განაცხადა პუტინმა.

ცნობისთგვის, აშშ-ის პრეზიდენტ ჯო ბაიდენსა და რუსეთის პრეზიდენტ ვლადიმერ პუტინს შორის პირველი პირისპირ შეხვედრა ჟენევაში შედგა.