ავტორი:

ბილ კლინტონიდან ჯო ბაიდენამდე - ვლადიმერ პუტინის ურთიერთობის საგა აშშ-ის პრეზიდენტებთან: ფოტოები და მნიშვნელოვანი დეტალები

ბილ კლინტონიდან ჯო ბაიდენამდე - ვლადიმერ პუტინის ურთიერთობის საგა აშშ-ის პრეზიდენტებთან: ფოტოები და მნიშვნელოვანი დეტალები

ჯო ბაიდენი აშშ-ის მეხუთე პრეზიდენტია, რომელთანაც რუსეთის ფედერაციის პრეზიდენტმა, ვლადიმერ პუტინმა შეხვედრა გამართა. აშშ-ისა და რუსეთის პრეზიდენტების ურთიერთობის "ტკბილ-მწარე" მომენტებს მედია ინახავს. ბილ კლინტონიდან ჯო ბაიდენამდე - თვალი გადავავლოთ პუტინისა და ამერიკის პრეზიდენტების შეხვედრების საგას:

  • ვლადიმერ პუტინი და ბილ კლინტონი

1999 წელს ვლადიმერ პუტინი რუსეთის ფედერაციის პრემიერ-მინისტრის რანგში შეხვდა აშშ-ის პრეზიდენტს, ბილ კლინტონს. შეხვედრა ნოემბერში, ნორვეგიაში, ოსლოში შედგა. ლიდერებმა ისაუბრეს ჩეჩნეთში რუსეთის სამხედრო ძალების ყოფნის შესახებ. კლინტონმა შეხვედრის შემდეგ თქვა, რომ პუტინს გარკვეულ საკითხებზე "გადაჭარბებული რეაქცია“ ჰქონდა.

2000 წლის 22 ივლისი, იაპონია, დიდი რვიანის სამიტის დაწყებამდე
2000 წელი და კიდევ ერთი ფოტო იაპონიიდან

აღნიშნულის შემდეგ რამდენჯერმე შეხვდნენ ლიდერები ერთმანეთს, თუმცა აღსანიშნავია შეხვედრა, რომელიც 2000 წელს მოსკოვში გაიმართა.

ამ დროს პუტინი უკვე რუსეთის პრეზიდენტია, ხოლო კლინტონისთვის პრეზიდენტობის ბოლო წელი. შეხვედრა მოსკოვში შედგა. საუბრის ძირითადი თემა ეროვნული რაკეტსაწინააღმდეგო თავდაცვის სისტემის საკითხი იყო. ყურადღება მიიპყრო ერთობლივმა პრესკონფერენციამ, სადაც კლინტონი და პუტინი ერთმანეთს არც კი უყურებდნენ.

  • ვლადიმერ პუტინი და ჯორჯ ბუში

2001 წელს, მას შემდეგ, რაც ჯორჯ ბუში პრეზიდენტი გახდა, ივნისში, სლოვენიის სამიტზე ვლადიმერ პუტინს შეხვდა. სწორედ ამ შეხვედრამდე თქვა ჯორჯ ბუშმა, რომ მას შეეძლო პუტინისთვის "თვალებში ჩაეხედა და მისი სული შეეცნო."

"ეს არის ადამიანი, რომელიც ერთგულია თავისი ქვეყნის და მოქმედებს თავისი ქვეყნის ინტერესებიდან გამომდინარე. მე ვაფასებ გულწრფელ დიალოგს და ეს არის ძალიან კონსტრუქციული ურთიერთობის დასაწყისი“, - აღნიშნა ჯორჯ ბუშმა პუტინთან შეხვედრის შემდეგ.

2001 წლის მიწურულს ბუშმა პუტინს კროუფორდში, ტეხასში უმასპინძლა. ლიდერები ტეხასის სკოლის სტუდენტებს შეხვდნენ. სამდღიანი სამიტის შემდეგ კი შეთანხმდნენ, რომ შეემცირებინათ აშშ-ისა და რუსეთის ბირთვული მარაგი.

რუსეთისა და შეერთებული შტატების პრეზიდენტები კიდევ რამდენჯერმე შეხვდნენ ერთმანეთს სხვადასხვა ფორმატში.

  • ვლადიმერ პუტინი და ბარაკ ობამა

ბარაკ ობამა აშშ-ის პრეზიდენტის რანგში არაერთხელ შეხვედრია ვლადიმერ პუტინს. მათი ურთიერთობა ყოველთვის გამოირჩეოდა დაძაბულობით. 2009 წლის 7 ივლისს პუტინმა ობამას მოსკოვში უმასპინძლა.

მაშინ მედია წერდა რომ ობამა შეხვედრისას იყო თავდაჯერებული და ოპტიმისტურად უყურებდა პუტინთან ურთიერთობის საკითხს.

"ვფიქრობ, რომ არსებობს შესანიშნავი შესაძლებლობა იმისთვის, რომ ამერიკისა და რუსეთს შორის ურთიერთობები უფრო მყარი გახდეს“, - განაცხადა ობამამ რუს კოლეგასთან შეხვედრის შემდეგ.

პუტინისა და ობამას მორიგი შეხვედრა 2013 წელს, ჩრდილოეთ ირლანდიაში დიდი რვიანის სამიტის ფარგლებში შედგა.. ეს უკვე ის პერიოდია, როდესაც ობამა მეორე ვადით აირჩიეს პრეზიდენტად. მხარეებმა ისაუბრეს სირიის კონფლიქტზე.

მას შემდეგ იყო რამდენიმე შეხვედრა. 2015 წელს ლიდერები გაერთიანებული ერების ორგანიზაციაში შეხვდნენ ერთმანეთს. ისაუბრეს სირიისა და უკრაინის შესახებ, თუმცა ვერცერთი კონფლიქტის შესახებ ვერ მიაღწიეს შეთანხმებას.

2016 წელს პუტინისა და ობამას ბოლო ოფიციალური შეხვედრა დიდი 20-ის სამიტზე, პეკინში გაიმართა, თუმცა არც ეს შეხვედრა ყოფილა ნაყოფიერი.

  • ვლადიმერ პუტინი და დონალდ ტრამპი

დონალდ ტრამპს ამერიკული პოლიტიკური ელიტა ხშირად სდებდა ბრალს ქვეყანაში რუსეთის ინტერესების გატარებაში. ტრამპის ურთიერთობა პუტინთან რადიკალურად განსხვავებული იყო ამერიკის სხვა პრეზიდენტებისა და პუტინის ურთიერთობისგან. ტრამპი ღიად გამოხატავდა ხოლმე აღფრთოვანებას პუტინის მიმართ.

მათი პირველი შეხვედრა პრეზიდენტების რანგში დიდი 20-ის ფარგლებში 2017 წელს, ჰამბურგში, გერმანიაში გაიმართა. შეხვედრის შემდეგ ტრამპმა თქვა, რომ საუბარმა ძალიან კარგად ჩაიარა.

კიდევ ერთი შეხვედრა 2018 წელს, 16 ივნისს ჰელსინკში გაიმართა. ტრამპმა დაუფარავად გამოხატა აღფრთოვანება რუსეთის ფედერაციის პრეზიდენტის მიმართ, რამაც ამარიკის შეერთებული შტატების პოლიტიკურ ელიტაში აღშფოთება გამოიწვია.

  • და ბოლოს, ვლადიმერ პუტინი და ჯო ბაიდენი

ბაიდენისა და პუტინის შეხვედრა, შვეიცარიაში, ჟენევაში გაიმართა. ლიდერები დახურულ კარს მიღმა ორ საათზე მეტხანს საუბრობდნენ. შეხვედრის დაწყებამდე ორივე პრეზიდენტი ერთმანეთისადმი მწვავე განცხადებებით გამოირჩეოდა. ჯო ბაიდენმა პუტინს რამდენიმე თვით ადრე მკვლელი უწოდა. აშშ-სა და რუსეთის პრეზიდენტებმა უარი თქვეს ერთობლივ პრესკონფერენციაზე და მედიის კითხვებს ცალ-ცალკე უპასუხეს.

ჯო ბაიდენმა პუტინთან შეხვედრის ტონს "პოზიტიური“ უწოდა - "შეერთებულმა შტატებმა აჩვენა მსოფლიოს, რომ ჩვენ ისევ ვდგავართ ჩვენს მოკავშირეებთან. ჩვენ ჩამოვაყალიბეთ ნათელი საფუძველი იმასთან დაკავშირებით, თუ როგორ ვაპირებთ რუსეთთან ურთიერთობას. ამ ვიზიტისას ბევრი საქმე გაკეთდა“, - განაცხადა ბაიდენმა.

ამასთან, თეთრი სახლი, ჟენევაში გამართული შეხვედრის შემდეგ, აშშ-ისა და რუსეთის პრეზიდენტების ერთობლივ განცხადებას ავრცელებს, სადაც ნათქვამია, რომ მხარეები თანხმდებიან, ბირთვული ომის მოგება შეუძლებელია და ის არასოდეს უნდა მოხდეს.

"ჰიტლერივით მზად არიან, თავიანთი შვილები ბელადს შესწირონ" - კადიროვის გარემოცვის მიერ გავრცელებული ვიდეოს რუსეთში მწვავე რეაქციები მოჰყვა

იტალიელმა პროფესორმა G20-ის მონაწილეებს "შოუ მოჰპარა“ - წელს ზემოთ შიშველი ნიკოლა ფრანჯიონეს ფოტოები, რომელსაც პოლიტიკოსებმა მყუდროება დაურღვიეს

ჯილდო გულშემატკივრობისთვის: რა საჩუქრები მიიღო ფანმა, რომლის ვიდეოც ინტერნეტჰიტი გახდა - "მან მთელი შვეიცარიის ემოცია გამოხატა"