Victoria’s Secret-ი ანგელოზების გარეშე და ეპოქის დასასრული - ვინ არიან ქალები, რომლებიც აღიარებულ სუპერმოდელებს ჩაანაცვლებენ

ადრიანა ლიმა, ქენდის სვეინპოული, ალესანდრა ამბროსიო, მირანდა კერი, როუზ ჰანთინგთონ უაითლი და სხვები ის ქალები არიან, რომელთა სახელებიც ქალის თეთრეულის პოპულარულ ბრენდთან, Victoria’s Secret-თან არის დაკავშირებული.

ათწლეულების განმავლობაში Victoria’s Secret-ი სწორედ ამ სუპერმოდელების სინონიმი იყო, სინონიმი უნაკლო გარეგნობისა და აღნაგობის მქონე ქალების, რომელთა გამოჩენასაც ბრენდის ყოველწლიურ შოუზე მთელი მსოფლიო დიდი ინტერესით ელოდა, მიუხედავად იმისა, თუ რა დამოკიდებულება ჰქონდათ მოდის ტენდენციებთან.

Victoria’s Secret-ის ანგელოზების სახელები მოდის სფეროში უდიდესი პოპულარობით სარგებლობდნენ და ბრენდის ანგელოზობა პრივილეგია იყო.

• თუმცა ახლა ყველაფერი შეიცვალა და Victoria’s Secret-ს ახალი სტრატეგია აქვს, რომლის მიხედვითაც, ქალის თეთრეულის ბრენდის მენეჯმენტის წარმომადგენლები აპირებენ, რომ იმოქმედონ თანამედროვე გამოწვევების შესაბამისად.

ანგელოზებს ბრენდი ელჩებით ჩაანაცვლებს. ელჩებს კი აირჩევენ არა გარეგნობის, არამედ იმის მიხედვით, თუ როგორი ისტორია აქვთ და რამდენად შთამაგონებელნი არიან საზოგადოებისთვის.

ასევე, ბრენდი გეგმავს სხვადასხვა კომპანიასთან საქველმოქმედო პარტნიორობას, რაც ხელს შეუწყობს ქალების მხარდაჭერას და მათ გაძლიერებას მთელ მსოფლიოში.

ახალ ელჩებს არ უწოდებენ ანგელოზებს, არამედ უწოდებენ კოლექტივს, რომელსაც ასე განსაზღვრავენ - "სრულყოფილი ქალების მუდმივად მზარდი ჯგუფი, რომელთაც აქვთ საერთო გატაცება პოზიტიური ცვლილებისკენ.“

ამ ეტაპზე ბრენდის ელჩები იქნებიან ადუტ აკეჩი, პრიანკა ჩოპრა, ვალენტინა სამპაიო, პალომა ელსესერი და სხვები. როგორც Victoria’s Secret-ში აცხადებენ, ელჩები დროდადრო შეიცვლებიან და ასევე მათ სხვა სახეებიც შეემატებათ.

წყარო: harpersbazaar.com