„ბიბლუსი“  ლიტერატურულ ტურნეს იწყებს - რა სურპრიზები ელოდება მკითხველს?

წიგნის მაღაზიათა ქსელი „ბიბლუსი“ 10 ივლისიდან ლიტერატურულ ტურნეს იწყებს. ტურნეს ფარგლებში კომპანიის წარმომადგენლები მწერლებთან ერთად ესტუმრებიან ბაკურიანს, თელავს, ბორჯომს, ზუგდიდს, ქუთაისს, ბახმაროსა და ბათუმს, სადაც შეხვდებიან ადგილობრივ მოსახლეობას და სხვადასხვა საინტერესო აქტივობას შესთავაზებენ სათამაშოების ქსელ ,,პეპელასა’’ და ,,XS’’-თან ერთად.

შეხვედრები „ბიბლუსის“ ფილიალების მიმდებარე ტერიტორიასა და პარკებში შედგება. ღონისძიებებში ჩართვა კი ნებისმიერ მსურველს შეეძლება, მათ შორის, ყველაზე პატარა მკითხველებს, რომელთა განწყობაზეც ყველასათვის საყვარელი წიგნის გმირები იზრუნებენ. საბავშვო ღონისძებების შემდეგ მკითხველებს შეხვდებიან ,,პალიტრა L’’-ის, ,,წიგნები ბათუმში’’-ს, ,,ინტელექტის’’, ,,არტანუჯის’’, ,,ბაკურ სულაკაურის გამომცემლობისა’’ და ,,დიოგენეს’’ ავტორები. მწერლები ისაუბრებენ როგორც საკუთარ შემოქმედებაზე, ასევე ზოგადად ლიტერატურაზე.

„ბიბლუსის ლიტერატურული ტურნეს მიზანია, ჩვენს მკითხველებს შევთავაზოთ მრავალფეროვანი და საინტერესო ლიტერატურული ღონისძიებები. გვინდა, დღესასწაული მოვუწყოთ არამხოლოდ უფროსი თაობის მკითხველებს, არამედ ბავშვებსაც, ამიტომ თითოეულ ქალაქში დაგეგმილი ღონისძიება საბავშვო აქტივობებით იქნება დატვირთული.

მნიშვნელოვანია, ბევრი ადგილი მოვიცვათ და ჩვენს მკითხველს საყვარელ მწერლებთან შეხვედრის საშუალება მივცეთ, ამიტომ წელს შევარჩიეთ 7 ქალაქი, სადაც ნამდვილ ლიტერატურულ დღესასწაულს მოვაწყობთ“, - აღნიშნეს „ბიბლუსში“.

ტურნეს ფარგლებში გაიმართება ხელსაქმის მასტერკლასები, კინოჩვენება, საუბრები მწერალთან, ანიმატორების შოუ და სხვა საინტერესო და სახალისო აქტივობები.

პირველ შეხვედრას „ბიბლუსი“ ბაკურიანისა და ბორჯომის მოსახლეობასთან, 10 ივლისს გამართავს, 17 ივლისს თელავში, ხოლო 24 ივლისს ზუგდიდსა და ქუთაისში, ბახმაროს 23 ივლისს ეწვევიან, ხოლო ბათუმს 29 ივლისს, სადაც მთელი ზაფხულის სეზონის განმავლობაში დამსვენებლებს საინტერესო აქტივობებს შესთავაზებენ.