ბრაზილიის პრეზიდენტს შესაძლოა, გადაუდებელი ოპერაცია დასჭირდეს - მას ათი დღეა სლოკინი სტანჯავს

ბრაზილიის პრეზიდენტს, ჟაირ ბოლსონარუს შესაძლოა, გადაუდებელი ოპერაცია დასჭირდეს. ამის შესახებ BBC წერს. გამოცემის ცნობით, პრეზიდენტი საავადმყოფოში მას შემდეგ მოათავსეს, რაც 10 დღის განმავლობაში სლოკინი სტანჯავდა და არ უჩერდებოდა.

კლინიკაში მოთავსებულმა ბოლსონარუმ კლინიკიდან "ტვიტერზე“ პოსტი გამოაქვეყნა და დაწერა, რომ უფლის წყალობით მალე კარგად იქნება.

როგორც BBC წერს, თავდაპირველად პრეზიდენტი ბრაზილიის სამხედრო საავადმყოფოში მოათავსეს და მას ექიმები 24-დან 48 საათის განმავლობაში უნდა დაჰკვირვებოდნენ. მოგვიანებით, პრეზიდენტის ადმინისტრაციაში განაცხადეს, რომ მედიკოსების რჩევა გაითვალისწინეს და ბოლსონარუ სან პაულოს კლინიკაში გადაიყვანეს.

ამასთან ისიც აღნიშნეს, რომ შესაძლოა, ოპერაცია გახდეს საჭირო. პრეზიდენტის ვაჟის, ფლავიოს ცნობით, მამამისს მუცლიდან სითხე ამოუღეს, მისივე ინფორმაციით, ჟაირ ბოლსონარუს საუბარი უჭირს. ექიმებზე დაყრდნობით კი ავრცელებს ინფორმაციას, რომ თუკი ოპერაცია გაკეთდება, "ეს არ უნდა იყოს რთული ქირურგიული ჩარევა."

ამ დროისთვის მედიისთვის უცნობია ბოლსონარუს ზუსტი დიაგნოზი.

აღსანიშნავია, რომ 2018 წელს ჟაირ ბოლსონარუს თავს დაესხნენ და მძიმედ დაჭრეს. მაშინ მან სისხლის 40% დაკარგა და დასჭირდა რამდენიმე ოპერაცია. ექიმებმა საბოლოოდ მისი გადარჩენა შეძლეს. აღსანიშნავია ისიც, რომ თვეების წინ ბრაზილიის პრეზიდენტმა კორონავირუსიც გადაიტანა.