ინდონეზიაში, კორონავირუსით ინფიცირებული მამაკაცი თავს თავისივე ცოლად ასაღებდა და თვითმფრინავში ასვლას ცდილობდა - რა მოხდა ბორტზე

ინდონეზიაში, კორონავირუსით ინფიცირებული მამაკაცი თავს თავისივე ცოლად ასაღებდა და ასე ცდილობდა თვითმფრინავში ასვლა მოეხერებინა. კაცს, რომლის მხოლოდ ინიციალებია ცნობილი (დ.ვ), ეცვა ქალის სამოსი და სახე მთლიანად ნიქაბით ჰქონდა დაფარული.

თან ჰქონდა ცოლის პასპორტი და ცოლის PCR ტესტის უარყოფითი პასუხი. თვითმფინავში ასვლა და ფრენა საბოლოოდ შეძლო, მაგრამ შუა ფრენის დროს "გამოიჭირეს."

როგორც BBC-ი წერს, ალბათ, ვერავინ მიხვდებოდა, რომ ის სინამდვილეში კაცი იყო, რომ არა ერთი შემთხვევა - შუა ფრენის დროს მან ნიქაბი მოიძრო.

აღნიშნულის შემდეგ, სტიუარდესამ განგაშის სიგნალი ჩართო.

როგორც სამართალდამცველებმა ჟურნალისტებს განუცხადეს, ფრენის დასრულების შემდეგ, მამაკაცი დაუყოვნებლივ დააკავეს და კორონავირუსზე ტესტი ჩაუტარეს.

მას შემდეგ, რაც აღმოაჩინეს, რომ კოვიდდადებითი იყო, იზოლაციაში გაუშვეს, თუმცა პოლიციელები აცხადებენ, რომ როდესაც კარანტინი დასრულდება, მას დაუყოვნებლივ სასჯელაღსრულების დაწესებულებაში გადაიყვანენ.