ზურაბ ჯაფარიძე მზადაა, თვითმმართველობის არჩევნებთან დაკავშირებით ოპოზიციურ პარტიებთან ერთჯერადად ითანამშრომლოს

პარტია “გირჩი- მეტი თავისუფლების” წევრებმა თვითმმართველობის არჩევნებისთვის, თბილისის მასშტაბით, ოპოზიციურ პარტიებთან ერთჯერადად თანამშრომლობის შესახებ მიიღეს გადაწყვეტილება. აღნიშნულთან დაკავშირებით პარტია სოციალურ ქსელში ინფორმაციას აქვეყნებს.

მათივე განმარტებით, გადაწყვეტილება კენჭისყრაში მონაწილე წევრების ხმათა უმრავლესობით მიიღეს, ხმები კი ასე გადანაწილდა: მომხრე: 54.72% (232 ხმა), წინააღმდეგი: 45.28% (192 ხმა).

კენჭისყრის პროცესი პარტიის წევრთა „ფეისბუქ“ ჯგუფში დღეს, 12:00 საათზე დაიწყო და 20:00 საათზე დასრულდა.

ცნობისთვის, გარცელებული ინფორმაციით, „ერთიანი ნაციონალური მოძრაობისა“ და ოპოზიციის ნაწილის თბილისის მერობის კანდიდატი ნიკა მელია, დედაქალაქის საკრებულოს თავმჯდომარის კანდიდატი ელენე ხოშტარია იქნება, ხოლო ვიცე-მერის პოსტს ოპოზიციის აღნიშნული ნაწილი „გირჩი-მეტი თავისუფლების“ ლიდერს, ზურაბ ჯაფარიძეს სთავაზობს.