"ჩემი ფავორიტი ქალიშვილი ანამარია" - დავით ბაგრატიონმა საზოგადოებას მისი და ირინა ბეგაშვილის შვილი გააცნო, როგორ გამოიყურება სამეფო ოჯახის წევრი?
"დავით ბაგრატიონი მეორედ ძველ სიყვარულზე დაქორწინდა - ქართველი პრინცის რჩეული ბეგაშვილია“ - ამ სათაურით გამოქვეყნდა Ambebi.ge-ზე სტატია 2021 წლის იანვარში.
მაშინ გიყვებოდით, რომ დავით ბაგრატიონ მუხრანელმა ირინა ბეგაშვილზე იქორწინა და წყვილი საგურამოში, დავითის ვილაში ცხოვრობდა. თუმცა მათი სიყვარულის ისტორია ბევრად ადრე დაიწყო. ჩვენი წყარო გვიყვებოდა, რომ ირინა ბეგაშვილმა და დავითმა ერთმანეთი წლების წინ გაიცნეს.
მაშინ დავითი ჯერ კიდევ არ იყო ანა ბაგრატიონზე დაქორწინებული, შორენა ბეგაშვილთან კი დაშორებული გახლდათ. დავითისა და ირინას ისტორია დიდხანს გაგრძელდა და წყვილი სწორედ მაშინ დაშორდა ერთმანეთს, როდესაც პრინცმა ანა ბაგრატიონზე იქორწინა.
ასევე წყაროს ინფორმაციით, დავითს და ირინა საერთო შვილი, გოგონა ანა მარია ჰყავდათ. დავითი ქართულ მედიასთან არ თანამშრომლობს და მისი არცერთი ინტერვიუ არ დაბეჭდილა, მას შემდეგ, რაც სამეფო ქორწინება შედგა. ანასა და დავითის წყვილი მალე განქორწინდა და დავითი ირინას დაუბრუნდა.
"ჩემი ფავორიტი ქალიშვილი, ანამარია ბაგრატიონ მუხრან - ბატონიშვილი" - ამ სახელწოდებით ანა მარიას ფოტო დავითმა სოციალურ ქსელში პირველად გამოაქვეყნა.
გოგონა დაახლოებით 11 წლის არის. მას შემდეგ, რაც დავითმა ირინა საზოგადოებას გააცნო, წყვილი უცხოეთში ყველა მნიშვნელოვან მონარქიულ ღონისძიებას ესწრება. სექტემბერში წყვილი მიტროპოლიტი იოანიკიეს ინტრონიზაციასთან დაკავშირებით გამორჩეული სტუმრებისათვის გამართულ სადღესასწაულო სადილს დაესწრო.
ოქტომბერში კი სანკტ-პეტერბურგში რომანოვების შთამომავლის, დიდი ჰერცოგის, გიორგი რომანოვისა და იტალიელ რებეკა ბეტარინის ქორწილს დაესწრნენ, სადაც დავითი გიორგი რომანოვის მეჯვარე გახლდათ. დავით ბაგრატიონ მუხრანელი და გიორგი რომანოვი სისხლით ნათესავები არიან.
გიორგი დავითის ბაბუის, ირაკლი ბაგრატიონ მუხრანელის უმცროსი დის, ლეონიდას შვილიშვილია. ლეონიდა წლების წინ მშობლებთან ერთად წავიდა ემიგრაციაში და 1934 წელს იქორწინა სუმნერ მოორ კიბიზე. მისგან ჰყავს ქალიშვილი ელენე. ლეონიდა მეორედ შვეიცარიის ქალაქ ლოზანში, რუსეთის ტახტის მემკვიდრე, დიდ მთავარ ვლადიმერ კირილეს ძე რომანოვზე გათხოვდა, რომელთანაც ქალიშვილი, მარია რომანოვა შეეძინა. გიორგი რომანოვი მარიას ერთადერთი ვაჟია.
დავითი და ირინა მცხეთაში საკუთარ ვილაში ცხოვრობენ, სადაც დავითს საკუთარი ვენახები აქვს და მუხრანის სახელობის ღვინოს აწარმოებს. დავითისა და ანას საერთო შვილი გიორგი ბაგრატიონ ბაგრატიონი, ოქტომბერში ათი წლის გახდა. ვაჟი დედასთან ცხოვრობს და ჩვენი წყაროს ინფორმაციით მამას შაბათ-კვირას სტუმრობს.
