ანგელა მერკელი უმაღლესი სამხედრო პატივით გააცილეს - როგორ დაემშვიდობა გერმანია ლიდერს, რომელიც ქვეყანას 16 წელი მართავდა (ფოტო, ვიდეო)
გერმანიის კანცლერი, ანგელა მერკელი თანამდებობას მომდევნო კვირაში ოფიციალურად დატოვებს და ამით მისი 16-წლიანი მმართველობის ეპოქა დასრულდება.
ბერლინში მერკელის პატივსაცემად გაცილების ოფიციალური ცერემონია გაიმართა და ის უმაღლესი სამხედრო პატივით გააცილეს. ცერემონიას ესწრებოდა 52 პოლიტიკოსი - ის მინისტრები, რომლებსაც მერკელის მმართველობის დროს ეკავათ თანამდებობა.
ანგელა მერკელმა საზოგადოებას სიტყვითაც მიმართა, თუმცა ეს იყო მხოლოდ რამდენიმე სამადლობელი წინადადება. მან ყველას მადლობა გადაუხადა და აღნიშნა, რომ ქვეყნის მომავალს ოპტიმისტურად უყურებს.
"მმართველობის 16 წელი სავსე იყო ურთულესი გამოწვევებით, როგორც პოლიტიკური, ასევე ადამიანური თვალსაზრისით“, - აღნიშნა მერკელმა.
ცნობისთვის, სამმა გერმანულმა პარტიამ - სოციალ-დემოკრატებმა, თავისუფალმა დემოკრატებმა და "მწვანეებმა“ ქვეყნის ახალი კოალიციური მთავრობის შექმნის შესახებ მოილაპარაკეს, რომლის ლიდერი სოციალ-დემოკრატი ოლაფ შოლცი იქნება. კოალიციას ხატოვნად "შუქნიშანი“ უწოდეს, მასში შემავალი პარტიების პოლიტიკური ფერების მიხედვით: წითელი, ყვითელი, მწვანე.
2021 წლის 26 სექტემბერს გამართული ბუნდესტაგის (პარლამენტის არჩევნების) შედეგად მიღებული ხმების რაოდენობით სოციალ-დემოკრატებმა პირველი ადგილი დაიკავეს, მე-2 - ქრისტიან-დემოკრატებმა, მე-3 - "მწვანეებმა“ და მე-4 - "თავისუფალმა დემოკრატებმა“. და რადგან ანგელა მერკელის პარტიამ - "ქრისტიან-დემოკრატებმა“ - უარი განაცხადეს ახალ მთავრობაში შესვლაზე და ოპოზიციაში გადავიდნენ, სოციალ-დემოკრატებმა მოლაპარაკება გამართეს "მწვანეებთან“ და "თავისუფალ დემოკრატებთან“.
ასევე დაგაინტერესებთ:
ნახეთ მერკელის გაცილების ვიდეო: