ბაიდენმა პუტინს "ომის დამნაშავე" უწოდა, ხოლო კრემლმა აშშ-ის პრეზიდენტის ამ განცხადებას - "უპატიებელი" - უმწვავესი შეფასებები უკრაინის ომის ფონზე
აშშ-ის პრეზიდენტი, ჯო ბაიდენი გაპრეზიდენტების შემდეგაც და მანამდეც გამოირჩევა რუსეთის პრეზიდენტის, ვლადიმერ პუტინის მკაცრი კრიტიკით. ის არ ერიდება საჯაროდ პუტინი "შეამკოს" ისეთი სიტყვით, როგორიცაა "მკვლელი" და ახლა უკვე მას "ომის დამნაშავე" უწოდა.
ჯო ბაიდენმა უკრაინის მხარდაჭერის ახალი პაკეტის წარდგენის შემდეგ, ჟურნალისტებთან გასაუბრებისას, პუტინი "ომის დამნაშავედ" მოიხსენია და ეს არის პირველი შემთხვევა, როდესაც მან პუტინის შეფასებისას ეს ფრაზა გამოიყენა.
- "ვფიქრობ, ის ომის დამნაშავეა“, - თქვა ბაიდენმა.
როგორც BBC-ი წერს, აშშ-ის პრეზიდენტის ადმინისტრაცია აქამდე თავს არიდებდა მსგავს შეფასებას და ამ ფრაზის გამოყენებას.
ბაიდენის განცხადებას უკვე მოჰყვა პირველი შეფასება კრემლში და მას "უპატიებელი" უწოდეს. საინფორმაციო სააგენტო TASS-ის ცნობით, კრემლში აცხადებენ, რომ ბაიდენის კომენტარები "მიუღებელი და უპატიებელი რიტორიკაა".
- ეს არ არის პირველი შემთხვევა, როდესაც ჯო ბაიდენმა მწვავე ეპითეტი გამოიყენა ვლადიმერ პუტინის მიმართ. ის ახალი გაპრეზიდენტებული იყო, როდესაც ABC-სთან ინტერვიუში თქვა - "მჯერა, რომ ის მკვლელია." წამყვანმა ბაიდენს ჰკითხა: "გჯერათ, რომ პუტინი მკვლელია?“, რაზეც პრეზიდენტის პასუხი ასეთი იყო - "დიახ, ამის მჯერა....მას მოუწევს ყველაფრის საფასურის გადახდა და ამას თქვენ ძალიან მალე დაინახავთ“, - აღნიშნა ბაიდენმა.
ბაიდენი ამ თემას მოგვიანებითაც დაუბრუნდა და თქვა - "გულწრფელი ვიყავი, როდესაც მას მკვლელი ვუწოდე."
აღსანიშნავია, რომ ჯო ბაიდენის პოლიტიკურ წარსულში ხშირია მისი მხრიდან პუტინის კრიტიკის ფაქტები. ერთ-ერთი კომენტარის დროს, ჯომ რუსეთის პრეზიდენტს "КГБ-ს თაღლითი" უწოდა.