ავტორი:

"საიდუმლო მიწისქვეშა ქალაქი" ურალის მთებში - რა არის ცნობილი პუტინისა და მისი უახლოესი გარემოცვის ბუნკერის შესახებ და რას "მალავს" იამანთაუს მთა

"საიდუმლო მიწისქვეშა ქალაქი" ურალის მთებში - რა არის ცნობილი პუტინისა და მისი უახლოესი გარემოცვის ბუნკერის შესახებ და რას "მალავს" იამანთაუს მთა

უკრაინაში რუსეთის შეჭრის შემდეგ, ბოლო კვირებია მედიაში წერენ, რომ რუსეთის ფედერაციის პრეზიდენტი ვლადიმერ პუტინი გარემოცვის უახლოეს წარმომადგენლებთან ერთად ბუნკერშია და პროცესებს ასე აკვირდება.

გამოცემა The Times-ის ცნობით კი, რუსეთის თავდაცვის მინისტრი სერგეი შოიგუ იმ პერიოდში, როცა გაუჩინარებული იყო, რეალურად, ურალის მთებში არსებულ მიწისქვეშა ქალაქში იმყოფებოდა.

სხვადასხვა გამოცემები მიუთითებენ რუსეთში რამდენიმე ბუნკერის არსებობაზე, თუმცა განსაკუთრებულ ინტერესს იწვევს ურალის მთებში არსებული ბაზა, "საიდუმლო მიწისქვეშა ქალაქი."

  • ურალის საიდუმლო ბაზა და პუტინის საყვარელი ადგილი

სხვადასხვა ცნობების მიხედვით, რუსეთის მთავრობის საიდუმლო ბაზა ურალის მთებში, სამხრეთით, აბზაკოვოს სათხილამურო ცენტრის მახლობლად მდებარეობს. ამ ადგილს რუსეთის პრეზიდენტი ვლადიმერ პუტინი ხშირად სტუმრობს. ბუნკერის მშენებლობა ცივი ომის შემდგომ პერიოდში დაიწყო. საინტერესოა, რომ ახლომდებარე დასახლებების მაცხოვრებლებმაც კი არ იციან ზუსტად, რა სახის ობიექტები აშენდა აქ, რადგანაც ყველაფერი მკაცრად გასაიდუმლოებულია.

პუტინი აბზაკოვოს სათხილამურო ტრასების ხშირი სტუმარი 21-ე საუკუნის დასაწყისიდან გახდა. არავინ იცის ზუსტი მიზეზი, თუ რატომ არის ეს პუტინის საყვარელი ადგილი. აღნიშნული ადგილი მაგნიტოგორსკიდან, დაახლოებით, 60 კილომეტრში მდებარეობს.

ოფიციალური ინფორმაციით, პუტინს უბრალოდ იქ სრიალი მოეწონა, მაგრამ არსებობს არაოფიციალური ვერსიაც, რომლის თანახმადაც, პრეზიდენტი იქ ჩადიოდა საიდუმლო მიწისქვეშა ქალაქის მშენებლობის პირადად გასაკონტროლებლად და მის დასრულებას თვალყურს ადევნებდა. ქალაქი კი მდებარეობს სამხრეთ ურალის მასივის უმაღლეს მთა იამანთაუს ქვეშ (იამანთაუ "ბოროტ მთას" ნიშნავს).

  • რას წერდა 90-იან წლებში დასავლური მედია საიდუმლო ობიექტის მშენებლობაზე?

ჯერ კიდევ 1996 წელს "ნიუ იორკ თაიმსმა“ გამოაქვეყნა სტატია, რომელშიც საუბარი იყო რუსეთში მშენებარე საიდუმლო სამხედრო ბაზის შესახებ.

"დასავლეთის ოფიციალური პირებისა და მათი რუსული წყაროების თანახმად, რუსეთი აშენებს ურალის მთების მიწისქვეშა გიგანტურ სამხედრო კომპლექსს. სამუშაოებში ჩართულია ათასობით მუშა“, - ნათქვამი იყო პუბლიკაციაში.

აღნიშნული თემა გააშუქეს სხვა მედიასაშუალებებმაც. 1997 წელს Washington Times-მა გამოაქვეყნა სტატია სათაურით - "მოსკოვი აშენებს ბუნკერებს ბირთვული თავდასხმის შემთხვევისთვის"

  • "რუსეთი სწრაფი ტემპით ახორციელებს ძვირადღირებულ პროგრამას მიწისქვეშა თავშესაფრების ასაშენებლად“, - ნათქვამი იყო სტატიაში. სტატიის ავტორი წერდა, რომ გრძელდება მუშაობა ურალის სტრატეგიული ძალების მიწისქვეშა სამეთაურო პუნქტის შექმნაზე.

უცხოური გამოცემები ცდილობდნენ აღნიშნულ საკითხზე რუსეთის ოფიციალური პირებისგან ინფორმაციის მიღებას, მაგრამ პასუხები ვერ მიიღეს.

მედიაში ასევე წერდნენ იმის შესახებაც, რომ იამანთაუზე, სავარაუდოდ, ურანის მადანს მოიპოვებდნენ და ასევე აქ განთავსებული იყო საკვები პროდუქტების უდიდესი რეზერვი.

  • რას ჰყვებიან ტურისტები, რომლებიც ურალის მთებს სტუმრობდნენ

ტურისტები, რომლებიც ურალის მთებს ყოველ წელს სტუმრობენ, არ ივიწყებენ იამანთაუს მთასაც. ისინი ამბობენ, რომ 2000-იანი წლების დასაწყისიდან აქ ზომები გამკაცრდა და მთის დალაშქვრა იკრძალება. მიზეზად "იამანთაუს გარემოს დაცვას“ ასახელებენ. საინტერესოა ისიც, რომ ის ადგილი, სადაც იამანთაუ მდებარეობს, სახელმწიფო ნაკრძალადაა გამოცხადებული, თუმცა ამ მიდამოებში პატრულირებენ არა გარემოს ზედამხედველობის სამსახურების წარმომადგენლები, არამედ სამხედროები.

"იამანთაუს მიდამოებში თუ მოხვდებით, განსაკუთრებული სიფრთხილე უნდა გამოიჩინოთ, არ უნდა გამოიწვიოთ ხმაური, ცეცხლი არ დაანთოთ, ისე უნდა მოიქცეთ, რომ თქვენი იქ ყოფნა ვერავინ შენიშნოს. სხვა შემთხვევაში ძალიან გარისკავთ და შესაძლოა, სპეცრაზმის ხელში აღმოჩნდეთ. შემდეგ მოგიწევთ დამტკიცება, რომ არ ხართ ჯაშუში ალაბამადან. საბოლოოდ, თუ გამოგიშვეს, ან მონადირეებს გადაგცეს და არ დაგხვრიტეს, გულწრფელად მადლობელი იქნებით“, - ეს ერთ-ერთი ტურისტის სიტყვებია, რომელიც ურალის მთების მონახულების მსურველებს რჩევას უზიარებს.

  • საიდუმლო ქალაქი

სხვადასხვა ცნობების მიხედვით, მიწისქვეშა ქალაქი უზრუნველყოფილია ყველანაირი კომუნიკაციით, მათ შორის ელექტროენერგიით. თავდაპირველად თვლიდნენ, რომ საქმე ეხებოდა მაღაროებს, თუმცა იქ არა მაღაროები, არამედ მიწიქვეშა ქალაქია განთავსებული. მედიაში გავრცელებულია რამდენიმე მშენებლის კომენტარი, რომლებიც მიწისქვეშა ქალაქის მშენებლობაში მონაწილეობდნენ და ისინი ანონიმურად საუბრობენ.

მოახერხეს რამდენიმე მშენებელთან დაკავშირება, რომლებიც მონაწილეობდნენ მის მშენებლობაში. ყველა მათგანმა თქვა, რომ სურდათ არ გაემჟღავნებინათ, ამიტომაც ისინი ანონიმურად საუბრობენ.

ერთ-ერთი მათგანი ამბობს, რომ მშენებლობა ცივი ომის პერიოდში დაიწყო. ობიექტი ააშენა თავდაცვის სამინისტროს დაქვემდებარებულმა სამშენებლო დეპარტამენტმა - Управления строительства-30-მა. ის იყო სპეციალიზებული მიწისქვეშა ნაგებობების მშენებლობაზე და ახორციელებდა ფართომასშტაბიან მიწისქვეშა მშენებლობებს. УС-30 ამ სფეროში უდიდესი სამშენებლო ორგანიზაციაა.

მიწისქვეშა ქალაქის მშნებელობა დაახლოებით 2002 წელს დასრულდა და მას შემდეგ მის მოსავლელად მუდმივად მუშაობენ.

იხილეთ ასევე:

სტატიის მოსამზადებლად გამოყენებული წყაროები:

eurasiantimes.com,

thetimes.co.uk

ishvetsov.ru

specoborona.ru