დღის ფოტო: გარდაცვლილი მფრინავების კადრები, რომელიც 2012 წელს არის გადაღებული: "მაშინაც თავგანწირვით იმუშავეს"
ტატო ნადირაძე სოციალურ ქსელში გარდაცვლილი მფრინავების ფოტოს ავრცელებს, რომელიც 2012 წელს არის გადაღებული.
მისი ინფორმაციით, მაშინ მფრინავები პოლონელი მთამსვლელების გადასარჩენად 4200 მეტრის სიმაღლეზე ავიდნენ.
"ბევრი დაიწერა და ბევრი ითქვა: პირველ რიგში, ვუთანაგრძნობ დაღუპულების ოჯახის წევრებს, სიტყვები ზედმეტია, შემდეგ მთელს საქართველოს.
მეწვის მთელი სხეული… სამწუხაროდ, დიდი ხანი ვერ შევავსებთ იმ დანაკლისს, რაც გუშინ დავკარგეთ… ზაზა, დიმკა, ლევან - ცათა სასუფეველი თქვენ.
მაშველი გმირია - პილოტები პროფესიონალები - კატასტროფის ბრიგადის ექიმები - წარმოუდგენელი მამაცები!!!! ეს ფოტოები 2012 წლის 4 აგვისტოსაა გადაღებული, უშბის კალთაზე,4200 მეტრის სიმაღლეზე პოლონელი მთამსვლელის სიცოცხლის გადასარჩენად მაშინაც თავგანწირვით იმუშავეს ბიჭებმა …
არ ვიცი რა ვთქვა, სათქმელი ბევრია, სანუგეშო ვერაფერი" - წერს ნადირაძე.
გუდაურში გუშინ მომხდარმა უმძიმესმა ტრაგედიამ მთელი ქვეყანა შეძრა. კატასტროფა განიცადა ვერტმფრენმა, სადაც პარაპლანით ფრენისას ჩამოვარდნილთა დასახმარებლად წასული მაშველები და ეკიპაჟის სხვა წევრები იმყოფებოდნენ.
ვერტმფრენის ბორტზე იმყოფებოდნენ: მაშველები - კახა ტორჩინავა, გიორგი მარგიანი; მფრინავები - ანდრო ქუჯოშვილი, ლევან ჩოხელი, ზაზა ლორია, დიმა ქააძე; სასწრაფოს დახმარების ექიმები - ქეთი გულაგაშვილი, გიორგი ვენეცკი.
ლევან ჩოხელს, ზაზა ლორიას და დიმა ქააძეს წლების სამუშაო გამოცდილება ჰქონდათ და მათ ურთულეს სამაშველო ოპერაციებს ანდობდნენ.
ნახეთ ასევე: