"რუსებმა ზაპოროჟიეს ელექტროსადგური აიღეს და სახიფათო პროვოკაციებს აწყობენ" - რა ინფორმაციას ავრცელებს პოდოლიაკი?
ატომური ენერგიის საერთაშორისო სააგენტომ და გაერომ რუსეთისგან მკაცრად უნდა მოითხოვონ დატოვონ ზაპოროჟიეს ატომური ელექტროსადგურის ტერიტორია და ის სპეციაური კომისიის კონტროლს დაუქვემდებარონ. ამის შესახებ უკრაინის პრეზიდენტის ოფისის ხელმძღვანელის მრჩეველმა მიხაილო პოდოლიაკმა „ტვიტერზე“ განაცხადა.
"ევროპის ბევრ ქალაქში ეს შაბათი დილა იმიტომ გახდა შესაძლებელი, რომ გუშინ ზაპოროჟიეს ატომური ელექტროსადგური სასწაულის ძალით არ აიწია ჰაერში. რუსებმა აიღეს ელექტროსადგური და აწყობენ სახიფათო პროვოკაციებს. ატომური ენერგიის საერთაშორისო სააგენტომ და გაერომ რუსეთისგან მკაცრად უნდა მოითხოვონ დატოვონ ზაპოროჟიეს ატომური ელექტროსადგურის ტერიტორია და ის სპეცილაური კომისიის კონტროლს დაუქვემდებარონ“,- განაცხადა პოდოლიაკმა.
ცნობისთვის, დღეს ეროვნული ატომური ენერგოგენერირების კომპანიის „ენერგოატომის“ მიერ გავრცელებული ინფორმაციის თანახმად, დილიდან ზაპოროჟიეს ატომური ელექტროსადგური რადიაციული და სახანძრო უსაფრთხოების სტანდარტების დარღვევის რისკით მუშაობს.
- ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში ჯოზეფ ბორელი ზაპოროჟიეს ატომურ ელექტროსადგურზე ატომური ენერგიის საერთაშორისო სააგენტოს წვდომას ითხოვს.
ის ატომური ელექტროსადგურის ირგვლივ რუსეთის სამხედრო მოქმედებებს გმობს და მათ ბირთვული წესების უპასუხისმგებლო დარღვევაში ადანაშაულებს. ამის შესახებ ბორელმა „ტვიტერის“ გვერდზე დაწერა.
"ევროკავშირი გმობს რუსეთის სამხედრო მოქმედებას ზაპოროჟიეს ატომური ელექტროსადგურის ირგვლივ. ეს ბირთვული უსაფრთხოების წესების სერიოზული და უპასუხისმგებლო დარღვევაა და რუსეთის მიერ საერთაშორისოდ აღიარებული წესების უგულებელყოფის კიდევ ერთი მაგალითი. ატომური ენერგიის საერთაშორისო სააგენტოს უნდა ჰქონდეს წვდომა ზაპოროჟიეს ატომურ ელექტროსადგურთან“,- განაცხადა ჯოზეფ ბორელმა.