"სასამართლოს თანამშრომლები ჩამოდიან სხდომის დარბაზში და ბრალდებულ ბასილაშვილთან ფოტოს იღებენ" - რას წერს ნეკა დოროყაშვილის ადვოკატი?
ჩოგბურთელ ნიკოლოზ ბასილაშვილის ყოფილი მეუღლის ნეკა დოროყაშვილის ადვოკატი ანა აბაშიძე სოციალურ ქსელში პოსტს აქვეყნებს და წერს, რომ დღეს გამართული პროცესზე შესვენების გამოცხადებისას, სასამართლოს თანამშრომლები ნიკოლოზ ბასილაშვილთან ფოტოებს იღებდნენ...
ანა აბაშიძე:
"სავარაუდოდ, ხვალ ნიკოლოს ბასილაშვილის სისხლის სამართლის საქმეზე განაჩენი გამოცხადდება. ამ წუთებში კი, სასამართლოს თანამშრომლები ჩამოდიან სასამართლო სხდომის დარბაზში და ბრალდებულ ბასილაშვილთან ფოტოს იღებენ. თან მოსამართლის კარიდან შემოვიდნენ შესვენების დროს. ასეთი არაფერი მინახავს და გამიგია. ტოტალურია ქალთა მიმართ სიძულვილი. აქ სუნთქვაც ჭირს. არ ვიცი, ამ გარემოში როგორ შეიძლება ვინმემ ობიექტურობა შეინარჩუნოს..."
იხილეთ ასევე:
შეგახსენებთ, რომ დღეს, თბილისის საქალაქო სასამართლოში ფსიქოლოგიურ და ფიზიკურ ძალადობაში ბრალდებული ჩოგბურთელის, ნიკოლოზ ბასილაშვილის საქმის დასკვნითი სხდომა გაიმართა.
ცნობისთვის, საქართველოს პროკურატურამ ყოფილი მეუღლის მიმართ განხორციელებული ფიზიკური ძალადობის ფაქტზე ნიკოლოზ ბასილაშვილს ბრალდება საქართველოს სისხლის სამართლის კოდექსის 126-ე პრიმა მუხლის მე-2 ნაწილის „ბ“ ქვეპუნქტით წარუდგინა, რაც გულისხმობს ოჯახში ძალადობას არასრულწლოვნის თანდასწრებით. მოგვიანებით პროკურატურამ ბასილაშვილს ბრალდება დაუზუსტა და მას ძალადობის რამდენიმე ეპიზოდთან ერთად, ფსიქოლოგიურ და ეკონომიკურ ძალადობასაც ედავებიან.
პროკურატურის ინფორმაციით, გამოძიებით დადგინდა, რომ 2020 წლის 21 მაისს, თბილისში, ავჭალის დასახლებაში, ნიკოლოზ ბასილაშვილმა ურთიერთშელაპარაკების ნიადაგზე, ყოფილი მეუღლის ნელი დოროყაშვილის მიმართ ფიზიკური ძალადობა განახორციელა. სამართალდამცველებმა ნიკოლოზ ბასილაშვილი 2020 წლის 22 მაისს დააკავეს. სასამართლომ ბასილაშვილს აღკვეთის ღონისძიების სახით 100 000-ლარიანი გირაო შეუფარდა.
ნიკოლოზ ბასილაშვილს ფიზიკური ძალადობის 4 და ფსიქოლოგიური ძალადობის ერთ ეპიზოდზე ედება ბრალი.