საქართველოს მოქალაქეებმა ისრაელის მრეწველობის მინისტრის მიწვევის გაყალბება სცადეს

საქართველოს მოქალაქეთა ჯგუფმა ისრაელის მრეწველობისა და ვაჭრობის მინისტრის, ბენიამინ ბენ-ელიეზერის მიწვევის გაყალბება სცადა. ამის შესახებ ებრაული გაზეთი "ედიოტ არზონოტი" წერს.

რამდენიმე კაცისგან შემდგარმა ჯგუფმა საქართველოში ისრაელის საელჩოში ვიზის მიღების თხოვნით დოკუმენტები წარადგინა და განაცხადა, რომ მინისტრმა ბენ-ელიეზერმა ისინი პირადად, "მეგობრების რანგში" ფორუმზე მიიწვია, რომელიც თელ-ავივში დღეს იხსნება.

საელჩოში მიწვევის გადამოწმების მიზნით ისრაელის მრეწველობისა და ვაჭრობის სამინისტროს დაუკავშირდნენ და დაადგინეს, რომ მინისტრს არანაირი "მეგობრული" მიწვევები არ გაუგზავნია. დიპლომატებმა მიწვევის გამყალბებლები ქართველ სამართალდამცველებს გადასცეს.

"ინტერპრესნიუსი"