პირველი ნახევარფინალისტი ცნობილია - მსოფლიო ჩემპიონატის ფავორიტი ბრაზილია გავარდა: ლივაკოვიჩი კვლავ მატჩის გმირია
კატარში მიმდინარე მსოფლიო ჩემპიონატის პირველი ნახევარფინალისტი ცნობილია, ეს ხორვატიაა, რომელმაც მეოთხედფინალურ მატჩში ფავორიტად მიიჩნეული ბრაზილია შინ გაუშვა.
მატჩი საკმაოდ მძიმე და ნაკლებად სანახაობრივი გამოდგა. მისი ბედი ძირითად დროში ვერ გადაწყდა.
სამხრეთ ამერიკელებმა ხორვატიას ბურთი დამატებითი დროის პირველ ტაიმში გაუტანეს. ნეიმარის გოლი მართლაც ულამაზესი გამოდგა, მან შეტევა მოედნის ნახევრიდან წამოიწყო და ხორვატების მეკარე დომინიკ ლივაკოვიჩიც კი მოატყუა და ბურთი ისე შეაგდო. უნდა აღინიშნოს, რომ ხორვატების მეკარემ ძირითად დროშიც და მერეც საკუთარი გუნდი არაერთხელ გადაარჩინა. ნეიმარი ამ გოლით გაუთანაბრდა პელეს გატანილი გოლების რაოდენობით და მასთან ერთად რეკორდსმენია ბრაზილიის ნაკრების ყველა დროის ბომბარდირებს შორის.
117-ე წუთზე პეტკოვიჩმა ანგარიში გაათანაბრა და ამ ჩემპიონატზე საქმე თერთმეტმეტრიანებამდე მესამედ მივიდა.
ლივაკოვიჩმა თამაში კვლავ საოცრად გააგრძელა და ბრზილიელთა პირველი დარტყმული თერთმეტმეტრიანი მოიგერია, რამაც შეიძლება ითქვას, რომ მატჩის ბედი გადაწყვიტა. ხორვატები, ტრადიციულად, ზუსტად ურტყამდნენ პენალტებს, კიდევ ერთმა ბრაზილიელმა ფეხბურთელმა ბურთი ძელს მოარტყა, რამაც საბოლოოდ დაასამარა ბრაზილიელების ოცნება ჩემპიონობაზე.
ხორვატია ნახევარფინალშია, ბრაზილია შინ მიემგზავრება.
ნახევარფინალში ხორვატია ნიდერლანდებსა და არგენტინას შორის გამარჯვებულს დაუპირისპირდება.
იხილეთ ასევე;
- "შენ ხარ დიდებული მეკარე... შეცდომის ნუ გეშინია, შეცდომას ყველა უშვებს" - ლუკას დარიგება და დომინიკის სასწაული
- პენალტების პირველი სერია და ხორვატების მეკარის გმირობა - ფეხბურთისა და ცეკვის გაკვეთილები ბრაზილიელებისგან: "ამათ ერთხელაც ვიღაც გალახავს"