"როცა დრო მაქვს, იატაკსაც ვწმენდ" - სააკაშვილისთვის ნასროლი შოკოლადი, აქციაზე გაცნობილი მეუღლე და ქორწილში ნაჩუქარი დოლარები: ვინ არის ირაკლი კობახიძის მინისტრი სიძე?
დავით ფაცაცია აფხაზეთის ავტონომიური რესპუბლიკის იძულებით გადაადგილებულ პირთა სამინისტროში მინისტრის პოსტს იკავებს. პოლიტიკოსი 1983 წელს სოხუმში დაიბადა. მოგვიანებით მედიასთან საუბრისას აფხაზეთის დატოვება ასე გაიხსენა...
"მამაჩემზეც მინდა გითხრათ, იგი აფხაზებმა - ალიკ ანქვაბმა და ნოდარ ხაშბამ უშუალოდ გამოიყვანეს და გადაარჩინეს. სწორედ ეს არის მეგობრობა. ჩვენ, ბავშვები მანამდე,18 სექტემბერს წამოვედით. სულ 17 ბავშვი, ჩემი ბიძაშვილები და დედაჩემი. მამაჩემი ჩარჩა და სხვათა შორის, აფხაზებმა ჩვენი სოფლის მოსახლეობას დაცვა დაუყენეს, 40 კაცს გამოუყვეს იკარუსი და გადაიყვანეს გალში. ამ დროს კი, მაპატიეთ და, გალში ჩვენებმა, ლოთი ქობალიამ და სხვებმა, გახადეს დევნილებს, ჩაუძვრნენ ყველაფერში, სადაც რამეს ნახავდნენ და გაძარცვეს. წარმოიდგინეთ, აფხაზებმა დაცვით ჩაიყვანეს ეს ადამიანები გალში და იმათ კი გაძარცვეს. ეს ხდებოდა 20 ოქტომბერს...“
მისი კარიერა 2001 წელს დაიწყო, როდესაც მუშაობა აშშ-ის საერთაშორისო განვითარების სააგენტოს (USAID) და აშშ-ის განათლებისა და განვითარების აკადემიის (AED) პროგრამაში ტრენერ-კოორდინატორად მოეწყო.
თუმცა საზოგადოებისთვის ცნობილი წლების შემდეგ, მიხეილ სააკაშვილთან მომხდარი ინციდენტით გახდა.
2011 წელს, საქართველოში "ეკვადორის კულტურის დღეების" საზეიმო გახსნაზე მარჯანიშვილის თეატრში მისულ საქართველოს მაშინდელ პრეზიდენტ სააკაშვილს ახალგაზრდების ჯგუფმა შოკოლადი ესროლა. ინციდენტის გამო პრეზიდენტის დაცვამ ახალგაზრდები – ვახტანგ მაისურაძე, გიორგი ლაპიაშვილი და დავით ფაცაცია – დააკავა...
"ქართული ოცნების“ პოლიტიკურ ასპარეზზე გამოჩენის შემდეგ, ის გარკვეული დროით პარტიის ახალგაზრდული ფრთის ლიდერი გახლდათ. დავით ფაცაცია იცავდა დევნილების უფლებებსაც, 2012 წელს წინასაარჩევნოდ ის იუსტიციის სახლთან გამართულ აქციაზე "ნაციონალური მოძრაობის“ დროინდელი შსს-ს მაღალჩინოსნებმა დააკავეს და მცირე ხნით პატიმრობა მიესაჯა.
- დავით ფაცაცია საზოგადოებისთვის აქტუალური კიდევ ერთხელ მას შემდეგ გახდა, რაც მაშინდელი პარლამენტის თავჯდომარის დაზე იქორწინა. ქეთევან კობახიძე პირველად ონში "ქართული ოცნების“ წინასაარჩევნო კამპანიის დროს გაიცნო და პირველი ნახვისთანავე მოეწონა.
გადამწყვეტი მომენტი მათ ურთიერთობაში სალომე ზურაბიშვილის არჩევნების მეორე ტურის დროს დადგა. ფაცაცია ამბობს, რომ მოულოდნელად აქციაზე ქეთევანი დაინახა, ქალი სასწავლო აკადემიაში ასწავლიდა და სამსახურიდან გამოსული, რუსთაველზე მიმდინარე მოძრაობას შეურთდა. აქციაზე დავითმა ქეთევანი დედას გააცნო. მოგვიანებით კი დავითმა შეყვარებულს სოციალურ ქსელში ბოდიში მოუხადა, რადგან სათანადო ყურადღება ვერ გამოიჩინა.
ორ თვეში წყვილმა იცოდა, რომ ბედს ერთმანეთს დაუკავშირებდნენ. 14 თებერვალს პოლიტიკოსმა ნარიყალაზე დიდი გული დაუნთო საყვარელ ქალს და ხელი სთხოვა. ქორწილის დღე 15 ივლისს დაინიშნა, პატარძალი ეკლესიაში მივიდა და ერთი საათი სიძე არ გამოჩნდა. როგორც აღმოჩნდა, სიძეს ჩაცმულობაზე პრობლემა შეექმნა და ჩოხის დეტალები ხელმეორედ გასასწორებელი გახდა.
"როცა დრო მაქვს ხანდახან იატაკსაც ვწმენდ და სარეცხსაც ვრეცხავ, თეფშებს ოღონდ და ჭიქებს, არა ტანსაცმელს" - ამბობს ფაცაცია დაოჯახების შემდეგ, გადაცემა "დღის პოსტისთვის" მიცემულ ინტერვიუში. წყვილს ერთი შვილი ჰყავთ, გოგი ფაცაცია...
ქეთევან კობახიძე პროფესიით ჟურნალისტია. მან თსუ-ს ტელერადიო ჟურნალისტიკის ფაკულტეტი დაამთავრა, თუმცა რამდენიმე წლის წინ, საკუთარ თავში ახალი ნიჭი აღმოაჩინა და ხატვა დაიწყო. მისი გამოფენები რამდენიმე ქვეყანაში მოეწყო, ის სამხატვრო აკადემიაში მასწავლებლად მუშაობს.
- დავით ფაცაციას დეკლარაცია
პოლიტიკოსმა დეკლარაცია 2022 წლის ოქრომბერში შეავსო, სადაც ვკითხულობთ, რომ ქეთევან კობახიძეს 2016 წელს ალექსიძის ქუჩაზე მდებარე 169 კვ.მ. ბინა სავარაუდოდ ოჯახისგან ჩუქებით გადაეცა. იმავე წელს აჩუქეს 20 კვ.მ. ავტოფარეხი. ქეთევან კობახიძის მფლობელობაშია 25% მიწის ნაკვეთი წყნეთში, რომელიც ოჯახმა 2019 წელს აჩუქა.
დეკლარაციაში დავით ფაცაციას სახელზე უძრავი ქონება არ ფიქსირდება. არ ფლობს ბიზნეს და ფასიან ქაღალდებს. ქორწილში პოლიტიკოსმა საჩუქრის სახით 69000 ლარი და 21000 დოლარი მიიღო.
ნახეთ ასევე: