ავტორი:

პუტინს ძველი მეგობარი "ცეცხლს უხსნის": "რუსეთის პრეზიდენტს პრიგოჟინმა კაბაევას მეშვეობით დაარტყა და ელიტას მასობრივი დასჯით ემუქრება"

პუტინს ძველი მეგობარი "ცეცხლს უხსნის": "რუსეთის პრეზიდენტს პრიგოჟინმა კაბაევას მეშვეობით დაარტყა და ელიტას მასობრივი დასჯით ემუქრება"

გამოცემა novaya.gazeta, რომელიც უკრაინაში ომის დაწყების შემდეგ, რუსეთში აკრძალეს, სოციალური ქსელის თავის გვერდზე პუტინის კარზე ახალი დაძაბულობის შესახებ წერს.

პოლიტიკური მიმომხილველის, ვილი მირზაიანოვის თქმით, პრიგოჟინმა პუტინს კაბაევას მეშვეობით დაარტყა და რუსულ ელიტას მასობრივი დასჯით ემუქრება...

"პუტინის გარემოცვაში დაპირისპირებები და გარჩევები მწვავდება. პოლიტიკური ექსპერტები კონფლიქტის ახალი კერების გაჩენის ტენდენციებს ხედავენ. საუბარია, პრიგოჟინის გააქტიურებაზე, კერძოდ, ის თავს ესხმის იმ სტრუქტურებს, რომელიც პუტინის მეორე ცოლის თუ საყვარლის, ალინა კაბაევას კონტროლის ქვეშ არის... ექსპერტების მტკიცებით, რაც დრო გადის, განხეთქილება იზრდება და კრემლის რეჟიმი სტაბილურობას კარგავს" - წერს მირზაიანოვი.

მისივე თქმით, პრიგოჟინი, რომელმაც ბოლო წლების განმავლობაში, პუტინის ნდობის მოპოვების გარდა, სხვა მხრივაც აქტიურად იმუშავა, გავლენები გაიმყარა და ამბიციებიც გაუჩნდა, აქტიურად ესხმოდა თავს რუსეთის თავდაცვის სამინისტროს, ბოლო ხანებში კი თავად პუტინის მიმართაც გაუჩნდა პრეტენზიები.

რამდენიმე დღის წინ, პრიგოჟინმა მწვავედ გააკრიტიკა ალინა კაბაევას საწარმოები და მედია, "ვაგნერთან" თანამშრომლობაზე უარის თქმისთვის.

ცნობისთვის, კაბაევას საკუთრებაშია ნაციონალური მედია ჯგუფი, რომელიც რუსეთში ერთ-ერთ ყველაზე გავლენიან ჰოლდინგად ითვლება. მასში შედის გამოცემები, РЕН ТВПятый канал, "78", "СТС", "Че!", "Домашний" და სხვები. მას მსხვილი წილი აქვს ასევე რუსეთის პირველ არხსა და ბეჭდურ მედიაში.

კაბაევას ჰოლდინგი აგრეთვე მოიცავს საპროდიუსერო კომპანიებს, ასევე მაღალტექნოლოგიური მომსახურების სააგენტოებს. პუტინის საოჯახო ბიზნესი ბოლო ხანებში პრიგოჟინის დარტყმის სამიზნეა, რადგან ის გრძნობს, რომ გამოიყენეს, მისი სამხედრო დანაყოფი უკრაინაში შავი სამუშაოს შესასრულებლად გაუშვეს, თუმცა მისი წინსვლა თავდაცვის სამინისტრომ და გენერალიტეტმა ვერ აიტანა და მათზე იერიშები წამოიწყეს.

agents.media-ს ცნობით, კაბაევას კონტროლირებად მედიაში პრიგოჟინის "ჩასაძირი" სიუჟეტები აქტიურად ვრცელდება, რაც "პუტინის მზარეულის" გაზრდილი პოპულარობის შემცირებას ემსახურება.

2017 წლიდან, მთელ რუსეთის სატელევიზიო სივრცეში, სარეკლამო ბიზნესს კაბაევას ჰოლდინგი აკონტროლებს. მედია-კომპანია, სადაც პრიგოჟინის სიტყვა ან გვარი გაიჟღერებს, სარეკლამო შემოსავლის გარეშე დარჩება...

გამოცემა agents.media-ს ცნობით, ადგილობრივ მედიაში ინტენსიურად იწერება პუტინი-კაბაევას საიდუმლო ურთიერთობებზე, რომლის მიხედვითაც, კაბაევამ რუსეთის პრეზიდენტისგან პირველი შვილი 2015 წელს, შვეიცარიაში გააჩინა, 2019 წელს კი, მოსკოვში მათი მეორე შვილი დაიბადა...

"2022 წელს კაბაევას წინააღმდეგ ამერიკამ, ბრიტანეთმა, კანადამ, ავსტრალიამ, ევროკავშირმა სანქციები დააწესა. ამის შემდეგ, ის ბიზნესის შიდა განვითარებაზე გადაერთო, მისი ჰოლდინგი კი, ანტიდასავლური იდეოლოგიის გამყარებისთვის ძალისხმევას არ ზოგავს" - წერს გამოცემა.

ანტისამთავრობო მედიის ცნობით, ამ ფონზე ევგენი პრიგოჟინს ერთის მხრივ, კაბაევას, იმავდროულად კი, გერასიმოვი-შოიგუს ტანდემთან ბრძოლა გაუჭირდება, თუმცა მხარდამჭერების გარეშე არც თავად არის დარჩენილი. პრიგოჟინის განცხადებებსა და ქმედებებიდან ჩანს, რომ ის ფარ-ხმალის დაყრას არ აპირებს...

"იმის მიუხედავად, რომ "ვაგნერს" თავისი სათადარიგო აეროდრომი და ძალზე მომგებიანი ბიზნესი აქვს აფრიკაში, სადაც შეუძლია, მშვიდად ჩავიდეს და ალმასებისა და ოქროს ბიზნესით მილიარდები იშოვოს, ის ამჟამად რუსეთში რჩება, რათა ბრძოლა უკვე რამდენიმე ფრონტზე გააგრძელოს" - წერს პოლიტიკური მიმომხილველი მირზაიანოვი.

მისივე თქმით, ეს ყველაფერი არ გამორიცხავს, რომ პრიგოჟინი დიდ პოლიტიკაში წავიდეს, მით უფრო, რომ მან კაბაევას ბიზნესზე, მისი გავლენის სფეროებსა და ტენდენციურ მიდგომებზე კრიტიკული შეფასებები გააკეთა, რაც "პუტინის მზარეულის" მხრიდან ძველი მეგობრის მისამართით ცეცხლის გახსნას ნიშნავს.

ნახეთ ასევე: