სვეტლანა მედვედევამ ბელგიელები უტაქტობით გააოცა

ვიდრე რუსეთის პრეზიდენტი დიმიტრი მედვედევი ბრიუსელში ევროკავშირის სამიტზე იმყოფებოდა, მისი მეუღლე სვეტლანა "ტურისტული" ვიზიტით ევროპის უძველეს ქალაქ ბრიუგეს ეწვია. ამის შემდეგ ბელგიურ პრესაში სტატიები გავრცელდა: "რუსეთის პირველმა ლედიმ ბრიუგე ერთ დღეში თავდაყირა დააყენაო".

მედვედევას ვიზიტი ადგილობრივი ხელისუფლებისთვის თავიდანვე უიღბლოდ დაიწყო. მედვედევა ქალაქის მერს პატრიკ მენარტს უნდა შეხვედროდა, თუმცა რუსეთის პირველი ლედი სტუმრებისთვის განკუთვნილ წითელ ხალიჩაზე 2 საათის დაგვიანებით გამოჩნდა. რუსული დელეგაციის წარმომადგენლებმა კი თავი უტიფრად იმართლეს: სვეტლანა მედვედევას დასვენება სჭირდებოდა, შემდეგ კი უნდა ესადილაო.

მოგვიანებით მედვედევის მეუღლემ ბრიუგეს მერთან საუბრისას უკიდურესი არადიპლომატიურობა გამოავლინა - მენარტმა მას 2018 წლის ფეხბურთის მსოფლიო ჩემპიონატის მასპინძლობა მიულოცა, მან კი უკმეხად უპასუხა: "გამარჯვებული ყველაფერს იღებს". იმის გათვალისწინებით, რომ კონკურსის ერთ-ერთი მონაწილე ბელგიაც იყო, სვეტლანა მედვედევას ეს ფრაზა განსაკუთრებულად უტაქტოდ ჟღერდა.

მედვედევას ახირებები პირველად ცნობილმა Rococo-ს მაქმანების მაღაზიამ იწვნია. მაღაზია ბრიუგეში უკვე 20 წელია არსებობს, თუმცა მის თანამშრომლებს ამდენი ახსნა-განმარტება ჯერ არცერთი კლიენტისთვის არ მ იუციათ. მაღაზიაში შესულმა სვეტლანა მედვედევამ ვიტრინაში განთავსებულ შარფს თვალი დაადგა. "ეს XVIII საუკუნის ექსკლუზიური შარფია, უნიკალური და ფასდაუდებელი მატერია, - უხსნიდა მას მაღაზიის მფლობელი, - ის არ იყიდება". მედვედევას გადარწმუნება ძალიან რთული აღმოჩნდა. "მესმის", - როგორც იქნა, კბილებში გამოსცრა მედვედევამ და მაღაზიის მეპატრონემ შვებით ამოისუნთქა.

შემდეგ იყო შოკოლადის მუზეუმი Choco-Story. მისი პერსონალი, როგორც მერი, საპატიო სტუმრის მოსვლას რამდენიმე საათი ელოდა. მუზეუმის პერსონალზე მედვედევას დაცვის სიჭარბემ განსაკუთრებული ”შთაბეჭდილება” მოახდინა, - 20-მა ადამიანმა მუზეუმში ჟრიამული ატეხა. მედვედევამ იქ ჯინი და შოკოლადი შეიძინა და პასუხად პერსონალს რუსული შოკოლადით გაუმასპინძლდა.  

მომდევნო "მსხვერპლი" ბელგიური რესტორანი აღმოჩნდა. მედვედევასა და მისი გარემოცვის წევრებისთვის სამვარსკვლავიან სასტუმრო Karmeliet-ში მაგიდა 20 კაცზე შეუკვეთეს, თუმცა რესტორანში არავინ მისულა, ადმინისტრაცია ამის შესახებ არცკი გააფრთხილეს. გაირკვა, რომ პრეზიდენტის მეუღლემ ბოლო მომენტში არჩევანი შეცვალა და უპირატესობა არხის სანაპიროზე მდებარე რესტორან Duc de Bourgogne-ს მიანიჭა.

ამ რესტორნის მომსახურე პერსონალს სტუმრის გამასპინძლება ასე არასდროს გასჭირვებია - მენიუ 6-7-ჯერ გამოცვალეს. მედვედევა შეკვეთას მათი მომზადების პროცესში, ზოგჯერ კი - კერძის სუფრასთან მიტანის შემდეგ ცვლიდა. 

მომზადებულია standaard.be-ს მიხედვით.