ვინ არის ალექსეი სტოლიაროვი, რუსეთის თავდაცვის მინისტრის "სირცხვილი და თავის ტკივილი" - ამბავი იმისა, თუ როგორ დააწყვიტა ნერვები სერგეი შოიგუს სიძემ
ცნობილ მეირმესა და ამჟამად რუსეთის თავდაცვის მინისტრს, სერგეი შოიგუს ცხოვრების საუკეთესო პერიოდი ნამდვილად არ უდგას (შენიშვნა: ცნობილია, რომ მისი ვიწროსპეციალობა სამხედრო ნაწილში მეირმეობა იყო).
ჯერ იყო და, ერთი წლის წინ, მისმა პრეზიდენტმა ისტორიაში ერთ-ერთი უშინაარსო, უმიზნო და არასაჭირო ომი წამოიწყო უკრაინასთან. ახლა კი, შოიგუს, რომელიც ალბათ, ტკბილ მოხუცებულობას აპირებდა და ფიქრობდა, რომ კარგად შენიღბა არმიის ძარცვა და ნგრევა, ყოველდღე ანგარიშის ჩაბარება უწევს, თუ რატომ არ აქვთ რუსებს ის წარმატება, რასაც ელოდნენ.
- მშვიდობის დროს შოიგუ და მისი პრეზიდენტი პერიოდულად პიკნიკებს აწყობდნენ, ხან ბუნებაში კარავში ეძინათ, ხან ნადირობდნენ, ხან თევზაობდნენ. ახლა პოლიგონიდან პოლიგონზე დარბის, ზოგჯერ დაჭრილ მობილიზებულებს შეუვლის, გმირის წოდებით დააჯილდოვებს.
შოიგუს რამდენადაც კარგად გამოსდის ქვეყნის ძარცვა, იმდენად არ ეხერხება თავის მართლება. მაგალითად, დიდად ვერავის დააჯერა, როდესაც ამაყი, კეთილშობილური სახით ამბობდა, რომ რუსეთის შეიარაღებულმა ძალებმა კიევი კეთილი ნებით დატოვეს.
- ნაძარცვი არმია არ არის ერთადერთი, რის გამოც შოიგუს თავის მართლება უწევს. გაცილებით უარეს მდგომარეობაშია სიძის გამო. ქსენია შოიგუს ქმარი, ალექსეი სტოლიაროვი სიმამრს დარდს არ აკლებს.
ზოგადად ალექსეი ექსცენტრიკული, გარყვნილი იუმორის მქონე და "ხასიათის ადამიანია." ჯერ კიდევ ომამდე "ინსტაგრამის" გვერდზე ფართო საზოგადოებისთვის მიუღებელ ვიდეოებს დებდა, თუმცა ამის გამო არავინ არაფერს ეუბნებოდა, გარდა იმისა, რომ შოიგუს მსუბუქად აკრიტიკებდნენ ხოლმე.
თუმცა რუსეთის უკრაინაში სრულმასშტაბიანი შეჭრის შემდეგ, სიძემ სიმამრს ნერვები დააწყვიტა.
ომის ერთი წლის თავზე, იური დუძმა "ინსტაგრამზე" პოსტი დადო, სადაც რა თქმა უნდა, პუტინის რეჟიმს აკრიტიკებდა და ბუჩას, ირპენის, მარიუპოლისა და ბახმუტის ტრაგედიებს უსვამდა ხაზს.
"თავდასხმის“ მინისტრის სიძემ ეს პოსტი მოიწონა. ფაქტი სოციალურ ქსელებში სწრაფად გავრცელდა, ალექსეიმ პოსტი "გადაიწუნა“, "ინსტაგრამის" ანგარიში კი ჩაკეტა, რომ უცხოებს არ მიეწერათ. თუმცა ერთმა მაინც მოასწრო.
- რას აკეთებ, რატომ ულაიქებ უკრაინელებს პოსტებს. წადი ფრონტზე, თუ რა ხდება, სიმამრი დაგიფარავს?
მოგვიანებით, სტოლიაროვს სხვებმაც მისწერს, მან კი ახსნა-განმარტებების წერა დაიწყო. სავარაუდოდ, შოიგუსთან გაიარა ამისთვის სკოლა. "მეგობრებო, ბევრ ნეგატივს ვხედავ. ყველას ერთად გპასუხობთ, არაფერი დამილაიქებია, არავისთვის არ მიმიწერია. გთხოვთ, გაგაჩნდეთ თქვენი თავი და ნუ მისცემთ სხვებს ფოტოშოპით მანიპულირების საშუალებას".
11 მაისს თითქმის მთელი რუსეთი პანიკაში იყო - წერდნენ, უკრაინა კონტრშეტევაზე გადმოვიდაო. სოციალურ ქსელებში უკვე იმაზეც მიუთითებდნენ, რომ უკრაინა რუსეთის ტერიტორიაზე შეჭრასაც აპირებდა (იმ საღამოს პანიკაზე ჩვენ უკვე გვეწერა და დეტალურად შეგიძლიათ იხილოთ აქ: უკრაინელთა საინფორმაციო შტურმი, პანიკაში ჩავარდნილი რუსი პროპაგანდისტები და პრიგოჟინის თხოვნა შოიგუს).
ზუსტად იმავე საღამოს სიძე სტოლიაროვი სოციალურ ქსელში ვლადივოსტოკიდან დებდა ვიდეოს, სადაც რესტორნის ქვითარს აფრიალებდა და ამბობდა, რომ 42 000 რუბლი დახარჯა, რაც დაახლოებით 1 400 ლარია.
ალექსეის ვიდეოს რადიკალურად უარყოფითი გამოხმაურებები მოჰყვა. სოციალური ქსელების მომხმარებლები მასთან ერთად შოიგუსაც ლანძღავდნენ.
- როგორც ჩანს, მეირმისთვის ეს უკვე წითელი ხაზი იყო. მეორე დღეს, 12 მაისს, სტოლიაროვი ლუგანსკში აღმოჩნდა. წარმოიდგინეთ, რამდენად გაამწარა სიმამრი, რომ თითქმის 10 000 კილომეტრი აფრინა (ვლადივოსტოკიდან ლუგანსკამდე 9 444კმ-ია).
გამოსწორების მიზნით წასულ სტოლიაროვს უკრაინელებმა Storm Shadow-ით უმასპინძლეს. ზუსტად იმ დღეს ლუგანსკის მანქანათმშენებლობის საწარმო ააფეთქეს. თავდაპირველად სიძე კავშირზე არ გადიოდა და გავრცელდა ვერსია, რომ ის გარდაიცვალა. თუმცა მოგვიანებით, დაწერა, რომ კარგად არის და არ დაშავებულა.
67 წლის შოიგუს ორი ქალიშვილი ჰყავს: იულია და ქსენია. ქსენიას ქმარია ალექსეიც, რომელთან ერთად გოგონა ხშირად მოგზაურობს. ომის პერიოდში ისინი ხშირად დუბაიში ისვენებენ.
- ავტორი: ანრი კურტანიძე