"როცა მოდიოდა, წინასწარ აფრთხილებდა, რომ არ გამოვჩენილიყავი" - ალენ დელონის ბნელი მხარე და შვილი, რომელიც უარყო: არი ბულონის ტრაგიკული ამბავი
20 მაისს, გამთენისას, 4:00 საათზე, პარიზის მე-15 უბნის პოლიციაში სატელეფონო ზარი გაისმა. 58 წლის ქალის თქმით, სახლში დაბრუნებულს მისი პარტნიორი გარდაცვლილი დახვდა. ქალი კრისტიან აარონ ბულონზე საუბრობდა, ლეგენდარული მსახიობის, ალენ დელონის ვაჟზე. ვაჟზე, რომელიც მსახიობს თავის შვილად არასდროს უღიარებია. 60 წლის ფოტოგრაფის ცხედარი საკუთარ სახლში იპოვეს.
გამოძიების პირველადი მონაცემებით, არი ბულონს ჯანმრთელობის პრობლემები ჰქონდა. ცოტა ხნის წინ ის საავადმყოფოშიც გადაიყვანეს. მას შემდეგ კი, რაც დაცემის შედეგად მძიმე ტრავმები მიიღო, ძირითადად ეტლით გადაადგილდებოდა. არის ცხედარი პარიზის სასამართლო ექსპერტიზის ინსტიტუტში გადაასვენეს.
ბულონის პარტნიორმა ქალმა, რომელიც კაცს ბოლო დროს ყურადღებას აქცევდა, განაცხადა, რომ ცხედარი პირველად მან იპოვა. გარდაცვალების დროს ქალი სახლში არ იმყოფებოდა. არი თავის 21 წლის ვაჟთან ერთად დატოვა. ცნობილი გახდა, რომ კაცი რამდენიმე დღის გარდაცვლილი იყო, რადგან სამართალდამცველების ცნობით, ცხედარს გახრწნა ჰქონდა დაწყებული.
პოლიციამ ქალი დააკავა "საფრთხის ქვეშ მყოფი ადამიანისთვის აუცილებელი დახმარების არაღმოჩენის" გამო.
არი ბულონი, 60 წლის ფოტოგრაფი, ათწლეულების განმავლობაში ამტკიცებდა, რომ ის ალენ დელონის შვილი იყო, თუმცა მსახიობი ამას ყოველთვის უარყოფდა.
კრისტიან აარონ ბულონის დედა ცნობილი მოდელი, ენდი უორჰოლის მუზა და Velvet Underground-ის წამყვანი მომღერალი გახლდათ, სასცენო სახელით "ნიკო.“ ქალი მუდმივად ამტკიცებდა, რომ მისი ვაჟი 1960-იანი წლების დასაწყისში ალენ დელონთან ხანმოკლე რომანის შემდეგ დაიბადა. აარონის დედა 1988 წელს ველოსიპედიდან გადავარდნის დროს მიღებული თავის ტრავმით გარდაიცვალა.
- ცხოვრება მშობლების გარეშე
არის მამა არ აღიარებდა, მაგრამ მისი ცხოვრების დრამა მხოლოდ ეს არ ყოფილა - არც დედას ჰქონდა სურვილი, რომ შვილი გაეზარდა. ბავშვი ჯერ კიდევ ჩვილი იყო, როდესაც ამერიკის შეერთებულ შტატებში ალენ დელონის დედა ჩაფრინდა და სავარაუდო შვილიშვილი თავისთან, პარიზში წაიყვანა. ედიტმა და მისმა მეორე მეუღლემ პოლ ბულონმა, აარონი იშვილეს. ბიჭი, რომელიც მთელი ცხოვრება ამტკიცებდა, რომ ალენ დელონის ბიოლოგიური შვილი იყო, მსახიობის მამინაცვლის გვარით მოკვდა.
აარონს დედასთან ცუდი ურთიერთობა ჰქონდა, ისინი პრაქტიკულად არ ურთიერთობდნენ. დედობას ბებია უწევდა. როდესაც ალენ დელონი დედის სანახავად მიდიოდა, მას წინასწარ აფრთხილებდა, რომ ბავშვი სადმე დამალულიყო, რადგან მისი ნახვის სურვილი არ ჰქონდა.
6 წლის ასაკში ბებიამ ბიჭი კათოლიკურ სკოლა-ინტერნატში მიაბარა, 16 წლის იყო, როდესაც იქაურობა მიატოვა და მზარეულობა გადაწყვიტა, მაგრამ ერთ წელიწადში გადაწყვიტა, რომ დედასთან დაბრუნებულიყო.
მოგვიანებით, თავის ავტობიოგრაფიულ ფილმში Love Never Forgets, არი ბულონი დედასთან ურთიერთობაზე საუბრობდა, ის ჰყვებოდა, როგორ იღებდნენ ერთად ნარკოტიკს.
"16 წლის ასაკიდან ვიყენებდით ერთსა და იმავე წამალს. ეს იყო ერთად ყოფნის საშუალება", - თქვა მან 2018 წელს ინტერვიუში.
25 წლის იყო, როდესაც 49 წლის დედა დაეღუპა. ამის შემდეგ ბიჭი ფსიქიატრიულ დაწესებულებაში მოხვდა. მკურნალობას წლები დასჭირდა. შემდეგ არი პერიოდულად მსახიობობდა, ფოტოგრაფობდა.
ბიოლოგიურ მამას ცხოვრებაში რამდენიმეჯერ შეხვდა. ერთ-ერთი შეხვედრისას, როდესაც ალენ დელონი დედის დაკრძალვაზე მივიდა, არის უთხრა, "შენ კარგი ბიჭი ხარ, მაგრამ ჩემი შვილი არა ხარ, შეხედე, ჩვენ არ ვგავართ ერთმანეთს."
2001 წელს არიმ გადაწყვიტა, რომ ოფიციალურად მოეპოვებინა ალენ დელონის შვილის სტატუსი, ამისთვის საქმე სასამართლოშიც შეიტანა, მაგრამ მსახიობი დნმ-ის ტესტის გაკეთებაზე ყოველთვის უარს ამბობდა.
ბოლო სარჩელი სასამართლოში 2019 წლის სექტემბერში შეიტანა, მაგრამ 2020-ის აგვისტოში უთხრეს, რომ რადგან ალენ დელონი 1984 წლიდან შვეიცარიაში ცხოვრობდა, ფრანგული სასამართლო მას ვერ აიძულებდა, რომ დნმ-ის ტესტი გაეკეთებინა. 2021-ის სექტემბერში იგივე პასუხი მიიღო აპელაციაზე. ესეც გაასაჩივრა...
ფრანგული პრესა ვარაუდობს, რომ არი ბულონის დაწყებული დავა, შესაძლოა, მისმა ორმა შვილმა, 24 წლის ჩარლზმა და 17 წლის ბლანშმა გააგრძლონ, რათა დაამტკიცონ, რომ ისინი ცნობილი მსახიობის შვილიშვილები არიან.
"ტრაგიკული ბედი.
სევდა.
მის ორ შვილზე ვფიქრობ..."
- დაწერა წუხელ "ინსტაგრამზე" ალენ დელონის შვილმა და უდიდესი ალბათობით, მისმა ძმამ ენტონი დელონმა მას შემდეგ, რაც სავარაუდო ძმის გარდაცვალების შესახებ შეიტყო.
ალენ დელონის შვილები
შეგახსენებთ, რომ ალენ დელონს რამდენიმე გახმაურებული რომანი ჰქონდა. 1958 წელს მან დაიწყო ურთიერთობა მსახიობ რომი შნაიდერთან. დაინიშნენ კიდეც, მაგრამ მოულოდნელად ნიშნობა ჩაშალეს.
1964 წელს დელონი დაქორწინდა მსახიობ ნატალი ბართლემისზე. ამ ქორწინებაში დაიბადა ვაჟი ენტონი დელონი. ოთხი წლის შემდეგ წყვილი ერთმანეთს დაშორდა.
1968 წელს დელონმა დაიწყო რომანი მსახიობ მირეილ დარკთან. 1987 წლიდან კი მსახიობი ჰოლანდიელ მოდელთან, როზალი ვან ბრემენთან ერთად ცხოვრობდა. ისინი 2001 წელს დაშორდნენ. წყვილს ქალიშვილი ანუშკა და ვაჟი ალენ-ფაბიენი შეეძინა.
გასულ წელს გავრცელდა ინფორმაცია, რომ 87 წლის ალენ დელონს სურვილი აქვს სიცოცხლე ევთანაზიით დაასრულოს. შვეიცარიაში, სადაც ის ცხოვრობს, ეს პროცედურა კანონით დაშვებულია. RTL-თან ინტერვიუში ენტონიმ განაცხადა, რომ ალენ დელონმა ევთანაზიით სიცოცხლის დასრულების შესახებ თავისი გადაწყვეტილება ანდერძში დააზუსტა და შვილს სთხოვა, რომ ყველა საჭირო საკითხი მოეგვარებინა და ბოლომდე მასთან დარჩენილიყო. ენტონი მამის გადაწყვეტილებას დათანხმდა, თუმცა არ სურს, რომ ევთანაზია თავად აღასრულოს.