"მე და ჯარჯი დავშორდით.... თურმე როგორც არ უნდა ეცადო, იყო საუკეთესო მეუღლე, მაინც შეიძლება ფსკერზე აღმოჩნდე" - რას წერს თათია შარანგია?
პიანისტი და ტელეწამყვანი თათია შარანგია, რომელმაც რამდენიმე თვის წინ იქორწინა, მეუღლეს შორდება. ამის შესახებ ის სოციალურ ქსელში წერს. როგორც ამბობს, დეტალებზე და მიზეზებზე ამ ეტაპზე არ ისაუბრებს.
"მე და ჯარჯი დავშორდით. საკუთარი ღირსების ხათრით, დეტალებზე და მიზეზებზე არ ვისაუბრებ, თუმცა თბილისი პატარა ქალაქია და ვთვლი, რომ ყველას ჩვენი ადგილი გვაქვს სოციუმში. თურმე როგორც არ უნდა ეცადო იყო საუკეთესო, მიძღვნილი მეუღლე, მაინც შეიძლება ფსკერზე აღმოჩნდე. ბოდიში გულშემატკივრებს, ვისაც ჩემს იმედგაცრუებაზე გული დაწყდება. მთავარია დაცემის შემდეგ ძლიერად წამოდგე ფეხზე და გპირდებით, ამაში არ დაგაღალატებთ", - წერს თათა შარანგია.
ცნობისთვის, თათია შარანგიამ ჯარჯი თორაძეზე ოფიციალურად ივნისში იქორწინა. ქორწილის ცერემონია თათიას დაბადების დღეზე გაიმართა. შარანგიამ და თორაძემ გრანდიოზული ქორწილი მცხეთაში, "მარანი ჰოლში“ გადაიხადეს. შარანგია-თორაძის ქორწილს არაერთი ცნობილი ადამიანი დაესწრო. მათ შორის, დიზაინერი ავთანდილ ცქვიტინიძე, საზოგადოებრივი კომუნიკაციების სპეციალისტი თეონა ბაღდავაძე, ცნობილი დერმატოლოგი ქეთევან ხიშტოვანი, ექიმი სოფო ჯაფარიძე, ჟურნალისტი ვიკა ბუკია, პოლიტიკოს გიორგი ვაშაძის მეუღლე ქეთი სიჭინავა.
ეს თათიასთვის მესამე ქორწინება იყო. პირველად ის ექსპრეზიდენტ ედუარდ შევარდნაძის შვილიშვილზე, ლაშა შევარდნაძეზე იყო დაქორწინებული, მათი ოჯახური თანაცხოვრება სამ წელიწადს გაგრძელდა. ამ ქორწინებიდან თათიას ჰყავს ორი შვილი, ედუარდი და ალექსანდრე შევარდნაძეები. თათია შარანგია მეორე მეუღლეს, სანდრო შელიას ათწლიანი ქორწინების შემდეგ დაშორდა, რომელთანაც საერთო ვაჟი ჰყავს.
რაც შეეხება მესამე მეუღლეს, ჯარჯი თორაძეს, მას პირველი ქორწინებიდან ორი შვილი ჰყავს.