რა არის ცნობილი კიმ ჩენ ინის მატარებლის შესახებ: "ტყვიაგაუმტარი ციხესიმაგრე", რომლის ინტერიერიც გასაიდუმლოებულია და ქართველი, რომელმაც წლების წინ კორეელ ლიდერთან ერთად იმგზავრა?
ჩრდილოეთ კორეის ლიდერის მატარებელმა რუსეთის საზღვარი 13 სექტემბერს გადაკვეთა. ეს კიმ ჩენ ინისა და ვლადიმერ პუტინის მეორე შეხვედრაა, მათი ბოლო მოლაპარაკება 2019 წლის აპრილში, ვლადივოსტოკში შედგა.
ფხენიანიდან რუსეთში ჩასვლას დაახლოებით 20 საათი დასჭირდა. ამ დროის განმავლობაში კიმ ჩენ ინი მატარებლით მგზავრობდა.
მწვანე მატარებელი, მეტსახელად "მოძრავი ციხესიმაგრე“, კიმის დინასტიის საყვარელი ტრანსპორტია. კიმების ოჯახის მატარებლით მოგზაურობისადმი მიდრეკილება იწყება ჩრდილოეთ კორეის დამფუძნებელ კიმ ირ სენისგან, რომელსაც ერთხელ საბჭოთა ლიდერმა იოსებ სტალინმა მატარებლის ვაგონი აჩუქა. ცნობილია, რომ კიმ ჩენ ინის მამას, კიმ ჩენ ირის ფრენის შიში ჰქონდა, ამიტომ ჩინეთსა და რუსეთში ყოველთვის მატარებლით მგზავრობდა.
2011 წელს ხელისუფლებაში მოსვლის შემდეგ, კიმ ჩენ ინმა თავისი მატარებელი მრავალი გახმაურებული ვიზიტისთვის გამოიყენა, მათ შორის იყო შეხვედრა დონალდ ტრამპთან.
მატარებლის ინტერიერი სულ რამდენიმე ადამიანს უნახავს, მათ შორის რუსი ჩინოვნიკი კონსტანტინე პულიკოვსკია. მისი თქმით, მატარებლის პერსონალი მგზავრებს მდიდრული მენიუთი უმასპინძლდება, ხოლო სტუმრების გართობაზე ახალგაზრდა მომღერლები ზრუნავენ.
"შესაძლებელია რუსული, ჩინური, კორეული, იაპონური და ფრანგული სამზარეულოს ნებისმიერი კერძის შეკვეთა“, - წერს კონსტანტინე პულიკოვსკი წიგნში "Orient Express.“
მატარებლის ვაგონები მოიცავს საძინებლებს და საკონფერენციო დარბაზებს, აღჭურვილია კედელზე დამონტაჟებული განათებითა და ტყავის სავარძლებით.
- სამხრეთ კორეული მედიის ცნობით, ჩრდილოეთ კორეას სულ 90 სპეციალური ვაგონი ჰყავს. ლიდერის მოგზაურობის დროს სამი მატარებელი ტანდემში მოძრაობს: პირველი უსაფრთხოების შემოწმებას ახორციელებს, მეორეში - უშუალოდ ლიდერი და მისი გარემოცვა იმყოფება, მესამე - მცველებისთვისაა განკუთვნილი. როდესაც კიმის მატარებელი სადგურს უახლოვდება, სხვა ლიანდაგზე ელექტროენერგია გამორთულია.
სამხრეთ კორეის გაერთიანების სამინისტროს ცნობით, კიმის ამჟამინდელ მატარებელს ტყვიაგაუმტარი ფანჯრები, გამაგრებული კედლები და იატაკი აქვს, რომლებიც ასაფეთქებელი ნივთიერებებისგან დაცვას უზრუნველყოფენ.
- ვინ არის წარმოშობით ქართველი დიპლომატი, რომელმაც ჩრდილოეთ კორეის იმჟამინდელი ლიდერის შეჯავშნული მატარებლით 7 დღე იმგზავრა?
როგორც ირკვევა, რამდენიმე წლის წინ, ქართული წარმოშობის, რუსეთში მომუშავე ყოფილმა დიპლომატმა გიორგი თოლორაიამ ჩრდილოეთ კორეის იმჟამინდელ ლიდერ კიმ ჩენ ირთან ერთად მატარებლით იმოგზაურა.
"საბჭოთა საელჩოში, ფხენიანში, ჩემი სამსახურის დასაწყისში შეჯავშნულ მატარებელში 7 დღე გავატარე, რომლითაც ჯერ მანჯურია, შემდეგ კი ციმბირი გავიარეთ, ძალიან კომფორტულ გარემოში და საუკეთესო გუნდთან ერთად", - იხსენებს თოლორაია უცხოურ გამოცემასთან.
იხილეთ ასევე: