სამუდამო პატიმრომა მიესაჯა კაცს, რომელმაც ნათესავი ქალი ელექტროშოკით აწამა და მოკლა - მანამდე მასზე ფიზიკურად ძალადობდა და უღებდა სექსუალური ხასიათის ფოტოებსა და ვიდეოს
- ფოტოზე: მოკლული მარიკა ბუთხუზი და მსჯავრდებული (კადრი/სქრინი შსს-ს მიერ გავრცელებული ვიდეოდან )
ნაფიცმა მსაჯულებმა გენდერის ნიშნით, განსაკუთრებული სისასტიკით ჩადენილი მკვლელობის ფაქტზე ბრალდებული დამნაშავედ ცნეს და სასამართლომ მას უვადო თავისუფლების აღკვეთა განუსაზღვრა. ამის შესახებ ინფორმაციას საქართველოს პროკურატურა ავრცელებს.
- ცნობისთვის, საქმე ეხება მარიკა ბუთხუზის მკვლელობის ამბავს. 36 წლის ქალი სასტიკად ნაწამები საკუთარ საძინებელში ნახეს.
პროკურატურის ცნობით, სასამართლო პროცესზე დადგინდა, რომ ბრალდებული მამაკაცი და მოკლული ქალი ბიძაშვილები იყვნენ. მკვლელობამდე ცოტა ხნით ადრე, ბრალდებული დაზარალებულის ბინაში საცხოვრებლად გადავიდა და გადაწყვიტა ეკონტროლებინა ბიძაშვილის ცხოვრება, მისი ურთიერთობები ოჯახის წევრებთან, მეგობართან. მამაკაცი ქალზე ფიზიკურად ძალადობდა, უღებდა სექსუალური ხასიათის ფოტოებს და ვიდეოებს.
"მკვლელობის დღეს, 2023 წლის 28 აპრილს, ბრალდებული დაზარალებულს რამდენიმე საათის განმავლობაში სასტიკად სცემდა და ელექტროშოკით აწამებდა. მიყენებული დაზიანებებით დაზარალებული ადგილზე გარდაიცვალა.
ბრალდების მხარემ სასამართლო პროცესზე წარადგინა დამაჯერებელი მტკიცებულებები, რომელთა ერთობლიობაც ბრალდებულის მიერ დანაშაულის ჩადენას ადასტურებდა. ნაფიცმა მსაჯულებმა, ბრალდებული დამამძიმებელ გარემოებებში - გენდერის ნიშნით და განსაკუთრებული სისასტიკით ჩადენილ მკვლელობაში დამნაშავედ ცნეს, სასამართლომ მას სასჯელის მაქსიმალური ზომა - უვადო თავისუფლების აღკვეთა განუსაზღვრა“, - ნათქვამია უწყების მიერ გავრცელებულ ინფორმაციაში.
შემთხვევა, რომელზეც პროკურატურის განცხადებაშია საუბარი, ვაზისუბანში, ჰუალინგის დასახლებაში აპრილის თვეში მოხდა. 36 წლის ქალი ქმარს იყო გაშორებული და სახლში ბავშვთან ერთად ცხოვრობდა. ადგილობრივები მომხდარის შემდეგ ამბობდნენ, რომ ქალთან ხშირად მოდიოდნენ ნათესავები და სულ ჩხუბის და ყვირილის ხმა ისმოდა. შსს-მ მკვლელობის მოტივად იმ დროს ეჭვიანობა დაასახელა.
წაიკითხეთ ასევე: