შურისძიება წარსულში მომხდარი დაჭრის გამო? - რა დეტალები ხდება ცნობილი 21 წლის ბიჭის მკვლელობაზე: ბრალდებული 18 წლის ახალგაზრდა უკვე დააკავეს
გუშინ, თბილისში მკვლელობა მოხდა. ორბელიანის მოედნის ტერიტორიაზე ახალგაზრდა მამაკაცი, ნიკიტა აგიევი სასიკვდილოდ დაჭრეს. აგიევი კლინიკაში მიყვანამდე, სასწრაფო დახმარების მანქანაში გარდაიცვალა.
დასისხლიანებული მამაკაცი უგონო მდგომარეობაში ქუჩაში მოქალაქეებმა ნახეს. მისი გადარჩენა ვეღარ მოხერხდა. სამივე ახალგაზრდა შემთხვევის ადგილიდან მიიმალა. აღნიშნულ საქმეზე შსს-მ გამოძიება 108-ე, განზრახ მკვლელობის მუხლით დაიწყო.
- როგორც სანდო წყარო AMBEBI.GE-ს უყვება, ნიკიტა აგიევსა და სამ ახალგაზრდას შორის სისხლიან დაპირისპირებას წინ კონფლიქტი უძღოდა, რომელიც იქვე, ბარში დაიწყო.
ახალგაზრდებმა შემდეგ ქუჩაში გადაინაცვლეს. ნიკიტა აგიევზე თავდასხმასა და მკვლელობაში სამივე ახალგაზრდა მონაწილეობდა, რომლებიც შემთხვევის ადგილიდან პოლიციის მისვლამდე გაიქცნენ.
სათვალთვალო კამერების ჩანაწერების საშუალებით სამართალდამცველებმა დამნაშავეთა იდენტიფიცირება მალევე მოახდინეს.
- როგორც AMBEBI.GE-მ გაარკვია, წარსულში ნიკიტა აგიევმა სამი თავდამსხმელიდან ერთ-ერთი დაჭრა (სავარაუდოდ, მკვლელობაში ეჭვმიტანილი) და გუშინდელი ინციდენტის მოტივიც შურისძიება უნდა იყოს.
რა განცხადებას ავრცელებს შსს?
"შინაგან საქმეთა სამინისტროს თბილისის პოლიციის დეპარტამენტის თანამშრომლებმა, ჩატარებული ოპერატიული ღონისძიებებისა და საგამოძიებო მოქმედებების შედეგად, 2005 წელს დაბადებული ს.პ. განზრახ მკვლელობის ბრალდებით დააკავეს. დანაშაული 10-დან 15 წლამდე ვადით თავისუფლების აღკვეთას ითვალისწინებს.
გამოძიებით დადგინდა, რომ ბრალდებულმა ურთიერთშელაპარაკების ნიადაგზე, მიმდინარე წლის 25 იანვარს, თბილისში, ცივი იარაღის გამოყენებით სასიკვდილო ჭრილობები მიაყენა - 2003 წელს დაბადებულ ნ.ა.-ს., რის შემდგომაც ადგილიდან მიიმალა. პოლიციამ ჩატარებული საგამოძიებო მოქმედებების შედეგად ბრალდებული დანაშაულის ჩადენიდან რამდენიმე საათში დააკავა. განზრახ მკვლელობის ფაქტზე გამოძიება საქართველოს სისხლის სამართლის კოდექსის 108-ე მუხლით მიმდინარეობს".