"ვაგნერის" რებრენდიგი - როგორ შეცვალა კრემლმა კერძო სამხედრო კომპანიის დანიშნულება და რა საქმეებში იყენებს პუტინი მას ახლა აფრიკაში
რუსეთი თავისი გავლენის გასაზრდელად, მოწინააღმდეგის დასუსტებისთვისა და დესტაბილიზაციისთვის არატრადიციულ მეთოდებს იყენებს. ერთ-ერთი ასეთი მეთოდი "ვაგნერის“ რებრენდინგი და ამ ორგანიზაციის განსხვავებული დანიშნულებით გამოყენებაა. "ვაგნერის" მეშვეობით კრემლი აფრიკის კონტინენტზე ბუნებრივ რესურსებზე წვდომას იუმჯობესებს. ამის შესახებ RUSI-ს (თავდაცვის გაერთიანებული კვლევების სამეფო ინსტიტუტი) 20 თებერვლის მოხსენებაშია ნათქვამი.
- რუსეთის პრეზიდენტმა ვლადიმირ პუტინმა აფრიკისა და ახლო აღმოსავლეთის ქვეყნებთან ეკონომიკური ურთიერთობების განვითარებაში დაინახა გზა, თუ როგორ უნდა დაიცვას თავი სანქციების პერიოდში, მაშინ, როდესაც უკრაინასთან სრულმასშტაბიანი ომის დაწყების შემდეგ, დასავლეთის ქვეყნები რუსეთის იზოლირებას ცდილობენ.
როგორც სამეფო ინსტიტუტის ექსპერტები ამბობენ, "ვაგნერი“ ევგენი პრიგოჟინის გარდაცვალების შემდეგ გადაეცა ГРУ-ს. იმის შემდეგ, კომპანია ფუნქციონირებს როგორც "საექსპედიციო კორპუსი". მათ აქვთ მიზანი - შეასუსტონ დასავლეთის სახელმწიფოების გავლენები და პოზიციები აფრიკასა და ახლო აღმოსავლეთში.
- ამასთან RUSI-ს მოხსენებაში დასავლური ქვეყნების კრიტიკაც არის. იქ მითითებულია, რომ დასავლეთს "არ გააჩნია იმ პრობლემების მოგვარების უნარი, რომლებიც აქვთ პარტნიორებს“. ექსპერტები ასევე წერენ აღნიშნულ რეგიონებში დასავლეთის დიდ იმედგაცრუებაზე, რაც "რუსეთის მანდატს“ რიგიანად ზრდის.
ასევე RUSI-ს მოხსენებაში ვკითხულობთ, რომ რუსეთის ხელისუფლება ჩეჩნეთის ლიდერს რამზან კადიროვს ისლამურ მოსახლეობაში გავლენის ფართო ქსელის შექმნაში იყენებს, როგორც ევროპაში, ასევე ახლო აღმოსავლეთში. რიგი სახელმწიფოები რომ რუსეთის სანქციებს არ უერთდებიან, ნაწილობრივ ეს კადიროვის დიპლომატიური კავშირების შედეგია, - ვარაუდობენ ექსპერტები.
როგორც მოხსენებაშია ნათქვამი, 2022 წლის ბოლოს, რუსეთის ხელისუფლება მივიდა დასკვნამდე, რომ მათ სხვაგვარად მოქმედება სჭირდებათ. კრემლის ადმინისტრაციის მოადგილეს, სერგეი კირენკოს დაევალა "განსაკუთრებული გავლენის უწყების“ მართვა. ასეთმა საკადრო ცვლილებებმა სავარაუდოდ, გამოიწვია უფრო მეტი პროპაგანდისტული კამპანიები. მაგალითად მოყვანილია მოლდოვა, სადაც დიდი დეზინფორმაციული კამპანია იყო ჩატარებული ევროკავშირში გაწევრების შესახებ.
- 2023 წლის 23 აგვისტოს "ვაგნერის“ დამაარსებლის ევგენი პრიგოჟინის კერძო თვითმფრინავი Embraer-ი ჰაერში აფეთქდა და ტვერის ოლქში ჩამოვარდა. ოფიციალური ვერსიით, პრიგოჟინი და კიდევ რამდენიმე გავლენიანი პირი დაიღუპნენ.
გასული წლის ივნისში პრიგოჟინმა და მისმა ჯარისკაცებმა რუსეთის თავდაცვის სამინისტროს წინააღმდეგ შეიარაღებული ამბოხი მოაწყვეს. რის ფარგლებშიც რამდენიმე ვერტმფრენი და რუსეთის არმიის ერთი თვითმფრინავი გაანადგურეს.
ვლადიმირ პუტინმა კერძო სამხედრო ორგანიზაცია სახელმწიფო ღალატში დაადანაშაულა, პრიგოჟინის წინააღმდეგ კი შეიარაღებული ამბოხის ბრალდებით სისხლის სამართლის საქმე აღიძრა. მოგვიანებით, ალექსანდრ ლუკაშენკოს შუამავლობით, "ვაგნერის“ ჯარისკაცებმა რუსეთის ტერიტორია დატოვეს და ბელარუსში გადავიდნენ. პუტინმა კი მათი დევნა შეწყვიტა.
ავტორი: ანრი კურტანიძე