"ამ ყველაფრის შეჩერება საკმაოდ რთული პროცესი იყო" - რატომ გაითიშა Facebook და Instagram? - Meta განცხადებას ავრცელებს
სოციალური ქსელები instagram და Facebook 5 მარტს 2 საათზე მეტი დროით გაითიშა. სოციალური ქსელების მფლობელი კომპანია META მიზეზებს განმარტავს და მომხმარებელს შექმნილი დისკომფორტის გამო ბოდიშს უხდის. Facebook-ის მილიონობით მომხმარებელი ვერ ახერხდებდა საკუთარ ანგარიშზე შესვლას, რადგან სისტემა წერდა, რომ "არასწორი პაროლი" შეჰყავდათ.
- როგორც Meta განმარტავს, ეს გამოიწვია "კონფიგურაციის გადამოწმების ავტომატიზებულმა სისტემამ და სისტემაში არსებულმა ხარვეზმა".
"ფეისბუქი გათიშული იყო დაახლოებით 2,5 საათის განმავლობაში. ეს ყველაზე უარესი გათიშვაა, რაც კი გვქონია ბოლო 4 წლის განმავლობაში და გვსურდა, რომ პირველ რიგში, ბოდიში მოგვეხადა თითოეული თქვენგანისთვის. ასევე გვსურდა მოგვეწოდებინა ინფორმაცია იმ ტექნიკურ დეტალებზე, რამაც გათიშვა გამოიწვია.
კონფიგურაციის გადამოწმების ავტომატიზებულმა სისტემამ გაცილებით მეტი ზიანი გამოიწვია, ვიდრე დააფიქსირა. ამ სისტემის მიზანია, შეამოწმოს კონფიგურაცია და იპოვოს ხარვეზები. ამ კონკრეტულ შემთხვევაში, სისტემამ არ იმუშავა", - ნათქვამია განცხადებაში.
- მათივე ცნობით, შეიტანეს იმგვარი ცვლილებები სისტემაში, რომელიც შეფასდა, როგორც "არასწორი". სწორედ ამის გამო მომხმარებლები ვეღარ ახერხებდნენ თავიანთ ანგარიშებში შესვლას.
"ამ ყველაფრის შეჩერება საკმაოდ რთული პროცესი იყო. საჭირო გახდა სოციალური ქსელების გამორთვა. შემდეგ კი ნელ-ნელა დავუშვით ადამიანები საიტზე.
კიდევ ერთხელ ვიხდით ბოდიშს გათიშვისთვის და გვსურს იცოდეთ, რომ ჩვენ ძალიან სერიოზულად ვუყურებთ Facebook-ის მუშაობას და მის სანდოობას", - ნათქვამია Meta-ს განცხადებაში.