რა ვიცით "ხორასანის" შესახებ - რას წარმოადგენს დაჯგუფება, რომელმაც მოსკოვში მომხდარ ტერაქტზე აიღო პასუხისმგებლობა
ტერორისტული დაჯგუფება, რომელმაც მოსკოვში მომხდარ ტერაქტზე აიღო პასუხისმგებლობა, ავღანეთში ე.წ. ისლამური სახელმწიფოს განშტოებაა, სახელწოდებით - "ისლამური სახელმწიფოს ხორასანის პროვინცია", ან ISIS-K.
- ISIS-k 2015 წელს "თალიბანის" პაკისტანური განშტოების უკმაყოფილო წევრებმა დააარსეს და "ისლამური სახელმწიფოს" კიდევ უფრო ძალადობრივი ვერსია გახდნენ. აღსანიშნავია, რომ 2021 წელს, ამერიკული საჰაერო ძალებისა და ავღანური კომანდოს ერთობლივი დარტყმების შედეგად, მისი წევრების რაოდენობა 1500-დან 2000-მდე მებრძოლით შემცირდა. მოკლეს დაჯგუფების მრავალი ლიდერი. ISIS-K-ს მდგომარეობა კიდევ უფრო დრამატული გახდა მას შემდეგ, რაც იმავე წელს "თალიბებმა" ავღანეთში ძალაუფლება ჩაიგდეს ხელში.
მიუხედავად ამისა, ისინი ეტაპობრივად ახერხებენ კვლავ ძალის მოკრებას. 2021 წლის აგვისტოში, ქვეყნიდან ამერიკელი სამხედროების გასვლის დროს, ქაბულის საერთაშორისო აეროპორტში თვითმკვლელმა ტერორისტმა ტერაქტი მოაწყო, რის შედეგადაც დაიღუპა 13 ამერიკელი ჯარისკაცი და 170-მდე მშვიდობიანი მოქალაქე.
პასუხისმგებლობა ISIS-k-მ აიღო.
- მას შემდეგ "თალიბანი" ავღანეთში ISIS-k-ის წინააღმდეგ ბრძოლას აწარმოებს. ჯერჯერობით "თალიბები" ხელს უშლიან ამ ჯგუფს ტერიტორიების ხელში ჩაგდებაში და ასევე, "თალიბანის" მებრძოლების რეკრუტირებაში. უფრო მეტიც, ამერიკელი გენერალი, ცენტრალური სარდლობის ხელმძღვანელი აცხადებს, რომ ISIS-K-ს აქვს შესაძლებლობა დარტყმა მიაყენოს შეერთებულ შტატებს სულ მცირე ექვს თვეში“.
ISIS ბოლო პერიოდში ცდილობს უფრო აქტიური იყოს გარე ოპერაციების თვალსაზრისით. ევროპაში კონტრტერორისტული ჯგუფები აცხადებენ, რომ მათ ბოლო თვეების განმავლობაში გაანადგურეს ISIS-k-ის რამდენიმე ტერორისტული გეგმა.
აღსანიშნავია, რომ სწორედ ამ ჯგუფმა აიღო პასუხისმგებლობა ირანში, ქერმანში 3 იანვარს მომხდარ ტერაქტზე, რომელსაც 95 ადამიანი ემსხვერპლა.
ტერორიზმის საკითხების მკვლევარი, ანალიტიკოსი კოლინ კლარკი ამბობს, რომ ბოლო ორი წლის განმავლობაში ISIS-K გამუდმებით აკრიტიკებს ვლადიმერ პუტინს. "ISIS K თვლის რომ კრემლს ხელები მუსლიმთა სისხლში აქვთ გასვრილი და მიუთითებენ მოსკოვის ინტერვენციაზე ავრანეთში, ჩეჩნეთსა და სირიაში“.
ავტორი: ანრი კურტანიძე