პენტაგონში აცხადებენ, რომ რუსეთმა ორბიტაზე კოსმოსური იარაღი გაუშვა - რა არის ცნობილი და რა შესაძლებლობები აქვს ამ იარაღს?
აშშ-ში აცხადებენ, რომ რუსეთმა გასულ კვირას თანამგზავრი გაუშვა და სავარაუდოდ, საქმე ეხება კოსმოსურ იარაღს, რომელსაც შეუძლია შეტევა დაბალ ორბიტაზე არსებულ სხვა თანამგზავრებზე.
"რუსეთმა დედამიწის დაბალ ორბიტაზე თანამგზავრი გაუშვა, რომელიც ჩვენი აზრით, კოსმოსური იარაღია“, - განაცხადა პენტაგონის სპიკერმა, გენერალმა პეტ რაიდერმა.
მისივე ცნობით, რუსეთმა თანამგზავრი განათავსა იმავე ორბიტაზე, სადაც აშშ-ის მიერ გაშვებული თანამგზავრია. რაიდერის თქმით, ვაშინგტონი გააგრძელებს სიტუაციის მონიტორინგს და მზად უნდა იყოს თავისი ინტერესების დასაცავად.
- მოსკოვი და ვაშინგტონი - ორი გლობალური მეტოქე, კოსმოსურ საკითხებზეც არაერთხელ დაჰპირისპირებიან ერთმანეთს. ბოლო კვირებში კი დავა გამწვავდა კოსმოსურ იარაღთან დაკავშირებით. ორივე მხარე ერთმანეთს ადანაშაულებს კოსმოსური სივრცის მილიტარიზაციაში.
რუსეთის საგარეო საქმეთა სამინისტროს სპიკერმა მარია ზახაროვამ განაცხადა, რომ აშშ ცდილობს კოსმოსის გადაქცევას "სამხედრო დაპირისპირების ასპარეზად“.
რუსეთის სახელმწიფო კოსმოსური სააგენტოს, "როსკოსმოსის" განცხადებაში კი ნათქვამია, რომ აღნიშნული თანამგზავრის გაშვება "რუსეთის ფედერაციის თავდაცვის სამინისტროს ინტერესებშია".
აღსანიშნავია, რომ ჯერ კიდევ გასულ თებერვალში თეთრ სახლი აცხადებდა, რომ მათი ინფორმაციით, "რუსეთი ავითარებს ახალ, "შემაშფოთებელ" კოსმოსურ იარაღს", - მაგრამ მაშინ თეთრი სახლი ამტკიცებდა, რომ იარაღი რუსეთს იმ დროისთვის არ ჰქონდა განთავსებული ორბიტაზე.
ნახეთ ასევე: