ალა პუგაჩოვას რუსეთში ქონებას ჩამოართმევენ? - პრიმადონა უკრაინაზე დაწერილი პოსტების გამო ახალ სკანდალში გაეხვა
რუსეთის სახელმწიფო დუმის დეპუტატები ალა პუგაჩოვას უცხოელ აგენტად აღიარებას და მისთვის ქონების ჩამორთმევას აპირებენ, მას შემდეგ რაც პრიმადონამ სოციალურ ქსელში უკრაინის შესახებ ახალი პოსტი დაწერა.
- პრიმადონამ ორი დღის წინ, რუსეთის მიერ კიევის ოხმატდიტის ბავშვთა საავადმყოფოს დაბომბვის დროს დაშავებული ბავშვის კადრი გამოაქვეყნა და დაწერა: "ღმერთი მომთმენია, მაგრამ ყველაფერს აქვს საზღვარი".
"დროა, ალა პუგაჩოვა აღიარებულ იქნას "უცხოურ აგენტად" და ჩამოერთვას რუსეთის ფედერაციაში არსებული ქონება, რადგან მის მიერ განხორციელდა რუსეთის ფედერაციის შეიარაღებული ძალების დისკრედიტაცია, დასავლური პროპაგანდის მიზნით", - განუცხადა "რია ნოვოსტის" სახელმწიფო სათათბიროს დეპუტატმა ალექსეი ჟურავლიოვმა. მან დასძინა, რომ შესაბამისი მოთხოვნა უკვე გაგზავნილია იუსტიციის სამინისტროში.
"დარწმუნებული ვარ, რომ გამოძიება დაიწყება. სურვილის შემთხვევაში, პუგაჩოვა თავის ქმედებებში აღმოაჩენს რუსული არმიის დისკრედიტაციას - და ეს უკვე მუხლია. რუსეთის ფედერაციის სისხლის სამართლის კოდექსით“, - განაცხადა დეპუტატმა.
- კიევის ბავშვთა საავადმყოფოზე სარაკეტო თავდასხმა 8 ივლისს მოხდა. უკრაინული მხარის ინფორმაციით, რუსეთმა კიევს X-101 საკრუიზო რაკეტით დაარტყა. რუსეთის თავდაცვის სამინისტრომ განაცხადა, რომ ჰოსპიტალს უკრაინული საჰაერო თავდაცვის რაკეტა მოხვდა და კიევისგან "პირველი არ არის, როცა მსგავსი პროვოკაცია ხდება“.
პრეზიდენტის პრესმდივანმა დიმიტრი პესკოვმა კიევის ბრალდებების კომენტირებისას აღნიშნა, რომ რუსული ჯარები ურტყამს მხოლოდ იმ ობიექტებს, რომლებიც დაკავშირებულია კიევის რეჟიმის სამხედრო პოტენციალთან.
75 წლის პუგაჩოვას უცხოელ აგენტად აღიარებას დეპუტატები ადრეც მოითხოვდნენ. ჯერ კიდევ მარტში სოციალურმა აქტივისტმა ვიტალი ბოროდინმა განაცხადა, რომ პუგაჩოვას უცხოურ აგენტად აღიარების პროცედურა უკვე დაწყებულია. თავად პუგაჩოვა ამ საკითხზე საჯარო განცხადებებს არ აკეთებს და მხოლოდ მიმართვაში მოითხოვა, რომ თავადაც მოხვედრილიყო "საყვარელი ქვეყნის უცხოელი აგენტების რიგებში..."
რუსეთ-უკრაინის ომის დაწყების შემდეგ პუგაჩოვა-გალკინის წყვილმა რუსეთი დატოვა და ისრაელში გადასახლდა. თუმცა ისინი პერიოდულად ცხოვრობენ დიდ ბრიტანეთში, იურმალასა და კვიპროსში. ალა პუგაჩოვა დროდადრო რამდენიმეჯერ რუსეთში პირადი საქმეებისთვის დაბრუნდა. შარშან ის მოსკოვში რუსი დიზაინერის დაკრძალვაზე დიმიტრი პესკოვსაც შეხვდა. პოლიტიკოსს ძალიან გაუხარდა მისი ნახვა და ხელზე აკოცა.
წაიკითხეთ ასევე: